భారత్ హైకమిషన్ అదుపులో నా భార్య: పాక్ వ్యక్తి ఆరోపణ

తాను వివాహం చేసుకున్న భారతీయ మహిళ వీసా కోసం ఇస్లామాబాద్‌లో భారత దౌత్య కార్యాలయాన్ని సంప్రదిస్తే ఆమెను బంధించారని పాకిస్థాన్ వ్యక్తి ఆరోపిస్తూ చేసిన వ్యాఖ్యలు ఆదివారం ఆ దేశ మీడియాలో హల్‌చల్ చేశాయి. అయితే ఈ ఆరోపణలపై భారత దౌత్య కార్యాలయం కూడా స్పందించింది. ఇది వరకే అతడికి వివాహం అయి నలుగురు పిల్లలు కూడా ఉన్నారని తెలియడంతో ఆమె తమ సహాయం కోరిందని ప్రకటించింది.

ఢిల్లీకి చెందిన యువతి ఉజ్మాకి పాకిస్థాన్‌ వ్యక్తి తహీర్‌తో మలేషియాలో ఏర్పడి పరిచయం ప్రేమకు దారితీసింది. దీంతో మే 1 న ఆమె వాఘా సరిహద్దు ద్వారా పాక్ చేరుకుంది. ఆ తర్వాత మే 3 న ఇద్దరూ వివాహం చేసుకున్నారు. ఆపై ఉజ్మా వీసా కోసం ఇస్లామాబాద్‌లోని హై కమిషన్ కార్యాలయానికి వెళ్లి, సంబంధిత పత్రాలతోపాటు మొబైల్ ఫోన్లు అధికారులకు సమర్పించారు. అధికారుల పిలవడంతో లోనికి వెళ్లిన ఉజ్మా బయటకు రాలేదని తహీర్ పేర్కొన్నాడు.

Pakistan Foreign Office statement on Indian woman married to Pakistani man @htTweets pic.twitter.com/UdX4fXkNId — Rezaul Hasan Laskar (@Rezhasan) May 7, 2017
ఎంత సేపటికీ బయటకు రాకపోవడంతో అధికారులను ఆమె గురించి ఆరా తీస్తే ఇక్కడ లేదని బదులిచ్చారని, అలాగే తన మూడు మొబైల్ ఫోన్స్ కూడా ఇవ్వలేదని ఆరోపించాడు. దీనిపై సెక్రటేరియట్ పోలీస్ స్టేషన్‌లో ఫిర్యాదు చేసినట్లు తాహీర్ తెలిపాడు. అయితే ఉజ్మా సహాయం కోరడంతోనే ఇక్కడ క్షేమంగా ఉంచామని భారత హై కమిషన్ కార్యాలయం తెలిపింది. ఆమె సహయాన్ని కోరిందని, ఓ కౌన్సిలర్ ఆమెకు సాయపడుతున్నాడని, ఆమె కుటుంబ సభ్యులతో సంప్రదింపులు జరుపుతున్నామని పేర్కొనడం గమనార్హం. తాహీర్ ఆరోపణలకు కూడా భారత్ దౌత్య కార్యాలయం ఖండించింది.