చిన్నారిపై అత్యాచారం, హత్య.. హంతకుడిని ఉరితీసిన పాక్

ఏడేళ్ల చిన్నారిపై అత్యాచారానికి పాల్పడటమే కాకుండా, ఆమెను దారుణంగా హత్యచేసిన హంతకుడిని పాకిస్తాన్‌లోని లాహోర్ జైల్లో బుధవారం ఉరితీశారు. వివరాల్లోకి వెళ్తే.. ఇమ్రాన్ అలీ అనే వ్యక్తి లాహోర్‌కు 50 కిమీల దూరంలో ఉన్న కసూర్‌లో ఏడేళ్ల చిన్నారిపై అత్యాచారానికి పాల్పడ్డారు. అనంతరం హత్యచేసి చెత్తకుప్పలో పడేశాడు.

ఈ ఘటన పాకిస్తాన్‌లో సంచలనం సృష్టించింది. ప్రజలంతా రోడ్ల మీదకు వచ్చి ఆందోళనలు చేపట్టారు. ఈ సందర్భంగా చెలరేగిన హింసలో ఇద్దరు మరణించారు కూడా. ఈ కేసు విచారించిన యాంటి టెర్రరిజం కోర్టు ఇమ్రాన్ అలీకి ఉరిశిక్ష విధించింది. అలీపై మరో తొమ్మిది.. అత్యాచారం, హత్య కేసులు కూడా ఉన్నాయి. చిన్నారి తల్లిదండ్రులు హంతకుడిని బహిరంగంగా ఉరి తేయాలనే డిమాండును కోర్టు తిరస్కరించింది. అలాగే, ఉరి శిక్షను లైవ్‌లో ప్రసారం చేయాలనే లాయర్ల డిమాండ్‌కు కూడా కోర్టు ఒప్పుకోలేదు. ఈ ఘటన జనవరి నెలలో చోటుచేసుకోగా, కోర్టు తీర్పు వెల్లడించిన వారం రోజుల్లోనే హంతకుడిని ఉరితీయడం గమనార్హం.