పోయెస్ గార్డెన్ పక్కనే పన్నీరు ఇల్లు

మాజీ ముఖ్యమంత్రి పన్నీర్ సెల్వం ఓ అద్దె ఇంటిలోకి మారారు. ఆయన మొన్నటి వరకు సీఎంగా అధికారిక నివాసంలో ఉన్నారు. ఇప్పుడు కొత్త సీఎం రావడంతో ఆయనను ఖాళీచేయించారు. దీంతో ఆళ్వారుపేటలోని వీనస్ కాలనీలో ఉన్న ఒక పెద్ద ఇంటిని అద్దెకు తీసుకున్నారు. ఆ ఇంట్లోకి కుటుంబసమేతంగా వచ్చారు. పన్నీరు దేవతలా కొలిచే అమ్మ ఇల్లయిన పోయెస్ గార్డెన్‌కు చాలా దగ్గర్లో ఈ ఇల్లు ఉంటుంది. ఆయన నూతన ఇంటి కోసం అనేక ప్రాంతాలను పరిశీలించారు. ఆయన మద్దతుదారులు చూసిన ఇంటిని చివరికి ఎన్నుకున్నారు. గత మంగళవారం ఆయన ఆ ఇంటిని పరిశీలించారు. అక్కడి వాతావరణం నచ్చడంతోపాటు పోయెస్‌గార్డెన్‌కు సమీపంలో ఉండటంతో ఆ ఇంటినే ఎంపిక చేసుకున్నారు. ఆయన కుటుంబ సభ్యులు కూడా ఇల్లు చూసి సంతృప్తి చెందారు. గురువారమే కుటుంబసమేతంగా కొత్త ఇంటికి చేరుకున్నారు పన్నీరు సెల్వం. సంప్రదాయబద్ధంగా ‘గృహప్రవేశం’ నిర్వహించారు. వీనస్‌కాలనీలోని ఇల్లు సమావేశాలకు, రాజకీయ కార్యకలాపాలకు అనువుగా ఉంటుందని ఆయన మద్దతు దారులు అన్నారు.