11వ రోజూ వృథా: లోక్‌సభ రేపటికి వాయిదా

పెద్ద నోట్ల రద్దుపై ఎలాంటి చర్చ జరగకుండానే లోక్‌సభ గురువారానికి వాయిదా పడింది. పార్లమెంట్ సమావేశాలు ప్రారంభమై నేటికి 11 రోజులు. ఈ 11 రోజుల్లో ఒక్క ఆదాయ పన్ను చట్ట సవరణ బిల్లు ఆమోదం తప్ప లోక్‌సభలో ఇంకెలాంటి నిర్ణయాలు తీసుకోలేదు. పెద్ద నోట్ల రద్దు నిర్ణయంపై చర్చించడానికి తాము సిద్ధమని ప్రభుత్వం ప్రకటిస్తే.. ప్రధాని సభకు హాజరైతే గాని చర్చకు వీల్లేదని ప్రతిపక్షాలు పట్టుబడుతున్నాయి. దీంతో సభలో ఎలాంటి చర్చ జరగకుండానే వాయిదాలు పడుతున్నాయి.

బుధవారం కూడా ఇదే పరిస్థితి లోక్‌సభలో కనిపించింది. ప్రధాన మంత్రి నరేంద్ర మోదీ సభకు హాజరుకావాలని, పెద్ద నోట్ల రద్దుపై వివరణ ఇవ్వాలని ప్రతిపక్ష ఎంపీలు పట్టుబట్టారు. అయితే ప్రశ్నోత్తరాల సమయంలో ప్రధాని సభకు హాజరయ్యారు. పెద్ద నోట్ల రద్దు, జమ్మూకశ్మీర్‌లో ఎన్‌కౌంటర్ అంశాలపై చర్చించడానికి ప్రభుత్వం సిద్ధంగా ఉందని బీజేపీ ప్రకటించింది. అయితే దీనిపై ప్రధాని సమాధానం చెప్పాలని ప్రతిపక్ష ఎంపీలు పట్టుబట్టడంతో సభను 12 గంటల వరకు స్పీకర్ సుమిత్రా మహాజన్ వాయిదా వేశారు. ఆ తరవాత తిరిగి సభ ప్రారంభమైనప్పటికీ ఇదే పరిస్థితి కొనసాగడంతో గురువారానికి వాయిదా వేశారు.