నా భర్త కనిపించడంలేదు.. ఏం జరిగినా ప్రభుత్వానిదే బాధ్యత: హార్దిక్ పటేల్ భార్య

పాటీదార్ ఆందోళన్ సమితి నేత హార్దిక్ పటేల్ గత 20 రోజులుగా కనిపించడం లేదని.. దీని వెనుక అధికారులు ఉన్నారని ఆరోపిస్తూ ఆయన భార్య కింజాల్ పటేల్ ఓ వీడియోను సోషల్ మీడియాలో పోస్ట్ చేశారు. ‘గత 20 రోజుల నుంచి నా భర్త జాడలేదు.. ఆయన ఏమయ్యారో తెలియదు.. దీనిపై మాకు కంగారుగా ఉంది.. ఈ విధమైన బాధను ఎవరైనా తట్టుకోగలరా.. ఒక్కసారి ఆలోచించండి’ అంటూ కింజాల్ ఏడుస్తూ పెట్టిన వీడియో ఇప్పుడు సామాజిక మాధ్యమాల్లో చర్చనీయాంశమవుతోంది.

హర్దిక్‌పై ఉన్న కేసులన్నీ మాఫీ చేస్తామని 2017లో గుజరాత్ ప్రభుత్వం హామీ ఇచ్చింది.. పటేళ్ల ఉద్యమంలో పాల్గొని బీజేపీలో చేరిన మరో ఇద్దరి నేతలను వదిలేసి ఆయననే ఎందుకు వేధిస్తున్నారని ఆమె వాపోయింది. హార్దిక్.. ప్రజలతో కలవకూడదని, ప్రజా సమస్యలను లేవనెత్తకూడడని ఈ ప్రభుత్వం కోరుకుంటోందని కింజాల్ ఆరోపించారు.

అయితే, హార్దిక్ చివరిసారిగా ఢిల్లీ ఎన్నికల్లో విజయం సాధించిన అరవింద్ కేజ్రీవాల్‌కు శుభాకాంక్షలు తెలుపుతూ ఫిబ్రవరి 11న ట్వీట్ చేశారు. రాష్ట్రంలో పంచాయతీ ఎన్నికలు సమీపిస్తున్నందున తనను జైలుకు పంపేందుకు గుజరాత్ ప్రభుత్వం ప్రయత్నిస్తోందని అంతకు ముందు రోజు హార్దిక్ ట్విట్టర్‌లో పేర్కొన్నారు. ‘నాలుగేళ్ల కిందట గుజరాత్ ప్రభుత్వం తనపై తప్పుడు కేసు బనాయించింది.. సార్వత్రిక ఎన్నికల సమయంలో ఈ కేసు గురించి వివరాలు తెలిపాలని అహ్మదాబాద్ పోలీస్ కమిషనర్‌ను అడిగితే తనపై ఎలాంటి కేసులేదన్నారు.. కానీ, పదిహోను రోజుల కిందట తనను అరెస్ట్ చేయడానికి పోలీసులు తన ఇంటికి వచ్చారు.. కానీ, ఆ సమయంలో నేను లేను’అని హార్దిక్ తెలియజేశాడు.

‘తనపై పెట్టిన తప్పుడు కేసులో ముందస్తు బెయిల్ కోసం దాఖలు చేసిన పిటిషన్ విచారణలో ఉంది.. ఇదే సమయంలో పలు నాన్-బెయిల్‌బుల్ వారెంట్లు జారీచేశారు.. పంచాయతీ ఎన్నికలు త్వరలో జరగునుండటంతో తనను జైల్లో వేయడానికి గుజరాత్ ప్రభుత్వం ప్రయత్నిస్తోంది.. కానీ, తాను మాత్రం బీజేపీకి వ్యతిరేకంగా పోరాటం సాగిస్తారు.. తర్వలో మిమ్మల్ని కలుసుకుంటాను’ అంటూ అందులో వివరించారు.

దేశ ద్రోహం కేసులో అహ్మదాబాద్ ట్రయల్ కోర్టు ముందు విచారణకు హాజరుకాకపోవడంతో హార్దిక్ పటేల్‌‌ను అరెస్ట్ చేసి జ్యుడీషియల్ కస్టడీకి తరలించారు. అనంతరం బెయిల్‌పై బయటకు వచ్చిన ఆయన తనకు ప్రభుత్వం నుంచి వేధింపులు ఎదురవుతున్నాయని ఆరోపించారు.