Paytm Is Back: మళ్లీ గూగుల్ ప్లే స్టోర్‌లోకి..

పేటీఎం యాప్‌ మళ్లీ గూగుల్‌ ప్లేస్టోర్‌లోకి అందుబాటులోకి వచ్చింది. తొలగించిన కొద్ది గంటల్లోనే అందుబాటులోకి రావడం విశేషం. ‘Update: And we are back’ అంటూ పేటీఎం ట్వీట్ చేసింది. ఇంతకుముందులానే యాప్‌ను డౌన్‌లోడ్‌ చేసుకోవచ్చని.. యూజర్లకు ఎలాంటి ఇబ్బందులు ఉండవని పేటీఎం స్పష్టం చేసింది. పేటీఎంతో లింకై ఉన్న అన్ని అకౌంట్లు 100% సేఫ్ అని పేర్కొంది.

విశేష గుర్తింపు పొందిన డిజిటల్‌ పేమెంట్స్‌ సంస్థ పేటీఎంను గూగుల్‌ శుక్రవారం (సెప్టెంబర్ 18) తన ప్లేస్టోర్‌ నుంచి తొలగించిన విషయం తెలిసిందే. దీంతో యూజర్లు ఆందోళనకు గురయ్యారు. పేటీఎంతో పాటు పేటీఎం ఫస్ట్‌ గేమ్స్‌ను కూడా గూగుల్ తీసివేసింది. పేటీఎం బిజినెస్‌, పేటీఎం మాల్‌, పేటీఎం మనీ యాప్స్‌ మాత్రం యథావిధిగా అందుబాటులో ఉన్నాయి.

పేటీఎం సంస్థ గ్యాంబ్లింగ్‌ నిబంధనలు పదే పదే ఉల్లంఘిస్తోందని.. ఇందుకు సంబంధించి నోటీసులు జారీ చేసినా సరైన స్పందన లేదని గూగుల్ పేర్కొంది. ఈ నేపథ్యంలో ఈ చర్యలు తీసుకున్నట్లు తెలిపింది.

గూగుల్‌ నిబంధనల ప్రకారం.. ఎలాంటి జూదాలు, ఆన్‌లైన్‌ బెట్టింగులు నిర్వహించకూడదు. కానీ, పేటీఎం, పేటీఎం ఫస్ట్‌గేమ్‌ యాప్స్‌ ద్వారా ఫాంటసీ క్రికెట్‌ సేవలను ప్రారంభించింది. ఈ చర్య జూదాన్ని ప్రోత్సహించేదిగా ఉండటంతో గూగుల్‌ ఈ నిర్ణయం తీసుకుంది.

గూగుల్‌ ప్లే స్టోర్‌ నుంచి తొలగించడంపై పేటీఎం స్పందించింది. త్వరలో మళ్లీ సేవలు ప్రారంభమవుతాయని ఆత్మవిశ్వాసం వ్యక్తం చేసింది. పేటీఎం యాప్‌ను యథావిధిగా వినియోగించుకోవచ్చని.. అందులోని సొమ్ముకు ఎలాంటి ఢోకా లేదని వినియోగదారులకు భరోసా ఇచ్చింది. ఆ తర్వాత కాసేపటికి సేవలు పునరుద్ధరించబడినట్లు ట్వీట్ చేసింది. ప్రస్తుతం పేటీఎంకు 5 కోట్ల మంది నెలవారీ యూజర్లు ఉన్నారు. పేటీఎం ఐవోఎస్‌ వెర్షన్‌ మాత్రం యథావిధిగా కొనసాగుతోంది.

Also Read: కరోనాతో మహిళ మృతి.. ఒంటిపై బంగారం మాయం

Must Read: పార్లమెంట్‌లో పోర్న్ చిత్రాలు చూస్తూ అధికార పార్టీ ఎంపీ.. ఎందుకు చూశారో తెలిస్తే షాకవుతారు!