జయ శవాన్ని తవ్వితీసి తరలించండి!

తమిళనాడు దివంగత ముఖ్యమంత్రి జయలలిత మృత‌దేహాన్ని మెరీనా బీచ్ నుంచి తొలగించాలని డిమాండ్ చేస్తూ ప్రజా ప్రయోజన వ్యాజ్యం దాఖలు అయ్యింది. జయ సమాధి వద్ద మణిమండపాన్ని నిర్మించనున్నట్టుగా తమిళనాడు ముఖ్యమంత్రి పళనిసామి ప్రకటించిన నేపథ్యంలో.. అది నిబంధనలకు విరుద్ధం అని, అసలు జయలలిత సమాధే అక్కడ ఉండటానికి వీల్లేదని.. అది నిబంధనలకు విరుద్ధమని ఒక న్యాయవాది చెన్నై హై కోర్టులో పిటిషన్ దాఖలు చేశాడు. జయలలిత నేరస్తురాలు అని కోర్టు కూడా తేల్చిందని, కాబట్టి ఆమె సమాధి ప్రముఖుల సమాధి పక్కన ఉండటానికి వీళ్లేదని పిటిషనర్ వాదించడం గమనార్హం.

ఈ పిటిషన్ ను విచారణకు స్వీకరించిన కోర్టు.. తమిళనాడు ప్రభుత్వానికి నోటీసులు జారీ చేసింది. మెరీనా బీచ్ లో కేవలం ప్రముఖులకు, తమిళ జాతీయ నేతలకు మాత్రమే సమాధులు, స్మారకాలను నిర్మించడం సంప్రదాయం. జయలలిత ఈ కోవకు చెందని వ్యక్తి అని దొరైస్వామి అనే న్యాయవాది తన పిటిషన్లో పేర్కొన్నారు. దేశ స్వతంత్రం కోసం మహాత్మగాంధీ, జవహర్ లాల్ నెహ్రూ వంటి వారు ఎలా పోరాడారో..తమిళుల కోసం అన్నాదురై, ఎంజీఆర్, కామరాజ్ నాడర్ వంటి వాళ్లు అలాగే పోరాడారు. అలాంటి వారికి మెరీనాలో స్మారకనిర్మాణాలు ఉండటంలో అర్థం ఉంది.

అయితే జయలలిత అక్రమాస్తుల కేసులో దోషిగా నిర్ధారణ అయ్యింది. ఆమెకు శిక్ష కూడా పడింది. ఆమె మరణానంతరం సాగిన విచారణలో ఆమెను దోషిగా పేర్కొంటూ కోర్టు తీర్పునిచ్చింది. అలాంటి వ్యక్తి స్మారకంగా మండపాన్ని నిర్మించడం ఏమిటి? ఇది ప్రజల్లోకి తప్పుడు సంకేతాలను పంపుతుంది.. అని పిటిషనర్ అభిప్రాయపడ్డారు.

కాబట్టి.. స్మారకమండపం నిర్మాణంపై స్టే విధించాలని, అంతేగాక మెరీనా బీచ్ నుంచి జయలలిత మృత‌దేహాన్ని తవ్వితీసి వేరే చోటికి తరలించేలా ఆదేశాలు ఇవ్వాలని పిటిషనర్ కోర్టును కోరారు. ఈ పిల్ పై విచారణ చేపట్టిన కోర్టు ప్రభుత్వానికి నోటీసులు జారీ చేసింది.