కార్డుదారులకు బంకుల షాక్, క్యాష్ ఉంటేనే పెట్రోల్!

డిజిటల్ లవాదేవీలను పెంచాలనే ఉద్దేశంతో కార్డుల ద్వారా పెట్రోలియం ఉత్పత్తులు కొనుగోలు చేసేవారికి 0.75 శాతం డిస్కౌంట్‌నిస్తూ కేంద్రం నిర్ణయం తీసుకున్న సంగతి తెలిసిందే. కానీ ఈ నిర్ణయం వెలువడి నెల రోజులైనా గడవక ముందే పెట్రోలు పంపులు సామాన్యుడికి షాకిచ్చాయి. సోమవారం నుంచి క్రెడిట్, డెబిట్ కార్డుల ద్వారా పెట్రోలు అమ్మకాలను నిలిపివేసే దిశగా నిర్ణయం తీసుకున్నాయి. ఆయిల్ అమ్మకాలపై 1 శాతం లెవీ విధిస్తూ చమురు మంత్రిత్వ శాఖ తీసుకున్న అనూహ్య నిర్ణయం కారణంగానే డీలర్లు ఈ బాట పడుతున్నారు.

దేశంలోని చాలా పెట్రోలు బంకుల్లో చెల్లింపుల కోసం హెచ్‌డీఎఫ్‌సీ బ్యాంకుకు చెందిన పీఓఎస్ మెషీన్లను ఉపయోగిస్తున్నారు. తాజాగా ప్రతి అమ్మకంపై ఒక శాతం లెవీ విధిస్తున్నట్లు ఆ బ్యాంకు ప్రకటించింది. ఈ నిర్ణయంతో కార్డుల ద్వారా పెట్రోలియం ఉత్పత్తుల అమ్మకాలను నిలిపేయాలని నిర్ణయించినట్టు పెట్రోలియం డీలర్స్ సంఘం నేత రవి షిండే తెలిపారు.

Petrol pumps using HDFC POS Machines won't accept payments through credit,debit cards as HDFC decides to levy 1 % charge for every sale.— ANI (@ANI_news) January 8, 2017
సర్ ఛార్జీ బాదుడు గురించి శనివారం రాత్రే ఐసీసీఐ, హెచ్‌డీఎఫ్‌సీ, యాక్సిస్ బ్యాంకులు డీలర్లకు సమాచారం అందించాయి. దేశవ్యాప్తంగా 52 వేల బంకుల్లో స్వైపింగ్ మెషీన్లు అందుబాటులో ఉండగా.. వీటిలో ఐసీఐసీఐ, హెచ్‌డీఎఫ్‌సీకి చెందిన స్వైప్ మెషీన్లే 60 శాతం దాకా ఉన్నాయి. లెవీ విధించాలన్న నిర్ణయం బంకు డీలర్లపై అదనపు భారం మోపనుందని ఆల్ ఇండియా పెట్రోలియం డీలర్స్ అసోసియేషన్ ప్రెసిడెంట్ అజయ్ బన్సల్ తెలిపారు.

నగదు ద్వారానే పెట్రోలు అమ్మకాలు సాగించాలని భావిస్తే.. ప్రస్తుత తరుణంలో ప్రజలు తమను విలన్లుగా చూసే అవకాశమే ఎక్కువగా ఉందని, కానీ లెవీ కారణంగా తప్పకపోవచ్చని డీలర్లు చెబుతున్నారు. ప్రజల నుంచి లెవీ వసూలు చేయలేం అలా అని తమ మార్జిన్‌ను వదులుకోలేం కాబట్టి తప్పనిసరి పరిస్థితుల్లో కార్డుల ద్వారా లావాదేవీలను నిలిపేయడమే మా ముందున్న మార్గమని డీలర్లు తెలిపారు.