నాకు ప్రాణభయం ఉంది, కాపాడండి.. ముందే వేడుకున్న టైలర్

రాజస్థాన్‌లోని ఉదయ్‌పూర్‌లో టైలర్ దారుణ హత్యోదంతం దేశవ్యాప్తంగా ప్రకంపనలు సృష్టిస్తోంది. ఈ ఘటనకు సంబంధించిన కీలక వివరాలు వెలుగులోకి వస్తున్నాయి. తనకు ప్రాణభయం ఉందని ముందే గ్రహించిన టైలర్ కన్హయ్య లాల్.. రెండు వారాల కిందటే స్థానిక అధికారులను కలిసి తనకు భద్రత కల్పించాల్సిందిగా కోరారు. అయితే, అధికారులు దాన్ని సీరియస్‌గా పరిగణించకపోవడం వల్లే ఈ దారుణం జరిగిందని ప్రస్తుతం విమర్శలు వెల్లువెత్తుతున్నాయి. పొరుగున నివాసం ఉండే నజీమ్ మరి కొందరు తనను తరచూ వెంబడిస్తున్నారని.. చంపేస్తామని బెదిరిస్తున్నారని కన్హయ్య లాల్ తన ఫిర్యాదు లేఖలో పేర్కొన్నారు.

ఓ మతాన్ని ఉద్దేశించి బీజేపీ మాజీ నాయకురాలు నుపుర్ శర్మ చేసిన ట్వీట్ అలజడి రేపిన సంగతి తెలిసిందే. నుపుర్ శర్మ ట్వీట్‌ను కన్హయ్య లాల్ రీట్వీట్ చేశాడు. ఈ ఘటనపై స్థానికంగా ఓ వర్గం ఫిర్యాదు చేయడంతో పోలీసులు కన్హయ్య లాల్‌పై కేసు నమోదు చేసి, అదుపులోకి తీసుకొని విచారించారు.

మతాన్ని అవమానించాడనే ఆరోపణలతో కన్హయ్య లాల్‌ను ఇద్దరు వ్యక్తులు దారుణంగా హత్య చేశారు. పట్టపగలే అతి కిరాతకంగా నరికి చంపారు. అంతేకాకుండా.. ఆ వీడియోను సోషల్ మీడియాలో పోస్ట్‌ చేసి, ప్రధానిని కూడా చంపేస్తామంటూ బెదిరింపులకు పాల్పడ్డారు. దీంతో ఈ ఘటన దేశవ్యాప్తంగా అలజడి రేపుతోంది. హత్యను ఖండిస్తూ రాజస్థాన్ సహా పలు ప్రాంతాల్లో జరిగిన ఆందోళనలు హింసాత్మకంగా మారాయి. ఉదయ్‌పూర్‌లో 144 సెక్షన్ విధించి భద్రతా దళాలను పెద్ద సంఖ్యలో మోహరించారు.

పాకిస్థాన్‌ కేంద్రంగా పని చేస్తోన్న ఓ ఉగ్రవాద సంస్థకు చెందిన ‘స్లీపర్‌ సెల్‌’ ఈ హత్యకు పాల్పడిందని నిఘా వర్గాల దర్యాప్తులో తేలినట్లు సమాచారం. కేంద్ర హోం శాఖ ఈ కేసు దర్యాప్తు బాధ్యతలను జాతీయ దర్యాప్తు సంస్థ (NIA)కు అప్పగించింది. అటు రాజస్థాన్ ప్రభుత్వం కూడా ఈ కేసు విచారణకు ప్రత్యేక విచారణ బృందాన్ని (SIT) ఏర్పాటు చేసింది. ఈ కేసులో ఇప్పటివరకు ముగ్గురు అనుమానితులను అరెస్టు చేశారు. మరో 10 మందిని విచారిస్తున్నారు.

Also Read:

✦ స్విమ్మింగ్ పోటీల్లో షాకింగ్ ఘటన.. స్పృహ కోల్పోయి కొలనులో మునిగిన స్విమ్మర్