నోట్ల రద్దు తర్వాత 3 లక్షల కంపెనీలపై నిఘా

భారత ఆర్థిక వ్యవస్థను గాడిలో పెట్టేందుకు ప్రవేశపెట్టిన గుడ్స్ అండ్ సర్వీసెస్ టాక్స్‌ని గుడ్ అండ్ సింపుల్ టాక్సుగా అభివర్ణించిన ప్రధాని నరేంద్ర మోదీ.. ఈ జీఎస్టీ రాకతో సరికొత్త భారత్ ఆవిష్కరిస్తుందని అన్నారు. జీఎస్టీ ప్రవేశపెట్టిన తొలిరోజైన శనివారం నాడు ఢిల్లీలోని ఇంధిరా గాంధీ ఇండోర్ స్టేడియంలో జరిగిన ఇనిస్టిట్యూట్ ఆఫ్ ఛార్డెడ్ అకౌంటెంట్స్ ఆఫ్ ఇండియా వ్యవస్థాపక దినోత్సవంలో ప్రధాని నరేంద్ర మోదీ పాల్గొని సీఏలని ఉద్దేశించి ప్రసంగించారు. ఆర్థికంగా దేశం అభివృద్ధి చెందడంలో ఛార్టెడ్ అకౌంటెంట్ల పాత్ర అతి కీలకమైనది అని మోదీ అన్నారు.

డాక్టర్లు రోగులకి వచ్చే వ్యాధులను నయం చేస్తారు. కానీ ఆర్థికపరమైన రుగ్మతలని నయం చేసే బాధ్యత మాత్రం ఛార్టెడ్ అకౌంటెంట్లపైనే ఉంది. అవకతవకలకి తావు లేకుండా ఆర్థిక వ్యవస్థను అభివృద్ధిపథంలో నడిపించేది సీఏలేనని ఈ సందర్భంగా పీఎం గుర్తుచేశారు. స్వచ్ఛభారత్ అభియాన్ అంటే దేశంలో అవినీతిని కూడా అంతమొందించడమే అని ప్రధాని స్పష్టంచేశారు.

స్వాతంత్ర్య ఉద్యమంలో లాయర్లు ఏ విధంగానైతే తమ వంతు పోరాటం జరిపారో మన దేశ ఆర్థిక వ్యవస్థను అభివృద్ధిపథంలో నడిపించేందుకు ఛార్టెడ్ ఎకౌంటెంట్లు కూడా అదే విధంగా కృషిచేయాల్సిన అవసరం వుందని ప్రధాని అభిప్రాయపడ్డారు. అవినీతిపరుల ఆటలు ఇక సాగవు అని సీఏలే అవినీతిపరులకి అర్థమయ్యేలా తేల్చిచెప్పాలని మోదీ సీఏలకి సూచించారు.

నవంబర్ 8న ప్రవేశపెట్టిన నోట్ల రద్దు కార్యక్రమం తర్వాత దేశంలో దాదాపు 3 లక్షల కంపెనీలపై విచారణ జరుగుతుండగా, మరో 37,000 బోగస్ కంపెనీల గుట్టువిప్పినట్టు మోదీ స్పష్టంచేశారు. క్రమక్రమంగా స్విస్ బ్యాంకులో వున్న నల్లధనాన్ని సైతం వెలికితీసేందుకు ప్రయత్నాలు జరుగుతున్నట్టు మోదీ ఈ వేదిక ద్వారా దేశానికి తెలిపారు.