GHMC: 28న హైదరాబాద్‌కు ప్రధాని మోదీ.. ఆకస్మిక పర్యటన!

ప్రధాని నరేంద్ర మోదీ నవంబర్ 28న హైదరాబాద్ రానున్నారు. ఆయన పర్యటన ఆకస్మికంగా ఖరారైనట్లు తెలుస్తోంది. గ్రేటర్ హైదరాబాద్ మున్సిపల్ ఎన్నికల (GHMC) ప్రచారంతో టీఆర్‌ఎస్, బీజేపీ విమర్శలు, ప్రతివిమర్శలతో ఇప్పటికే నగరంలో వాతావరణం వేడెక్కగా.. ప్రధాని మోదీ పర్యటన ప్రాధాన్యం సంతరించుకుంది. అయితే.. ప్రధాని మోదీ కరోనా వ్యాక్సిన్ అభివృద్ధి ప్రయోగాలను పరిశీలించడానికి వస్తున్నట్లు సైబరాబాద్ సీపీ సజ్జనార్ తెలిపారు. దేశ పౌరులకు కరోనా టీకా అందించడానికి విశేషంగా కృషి చేస్తున్న భారత్ బయోటెక్ సంస్థకు చేరుకొని Covaxin ట్రయల్స్‌ను పరిశీలించనున్నట్లు తెలుస్తోంది.

ప్రధాని మోదీ ఈ నెల 28న ఉదయం ఢిల్లీ విమానాశ్రయం నుంచి ప్రత్యేక విమానంలో పుణే చేరుకోనున్నారు. అక్కడ సీరమ్ ఇన్‌స్టిట్యూట్‌లో (CII) వ్యాక్సిన్ ఉత్పత్తికి సంబంధించిన సన్నాహాలను పరిశీలించనున్నారు. అనంతరం అక్కడ నుంచి భాగ్యనగరంలోని హకీంపేట ఎయిర్ పోర్టుకు చేరుకోనున్నారు. అక్కడ నుంచి నేరుగా భారత్ బయోటెక్ (Bharath Biotech) సంస్థకు చేరుకుంటారు. అక్కడ జరిగే కార్యక్రమాల్లో పాల్గొంటారు. నవంబర్ 28న మధ్యాహ్నం 3.40 గంటలకు ప్రధాని మోదీ హైదరాబాద్ చేరుకుంటారని సీపీ సజ్జనార్ ఓ ఆంగ్ల ఛానెల్ ప్రతినిధికి తెలిపారు.

వ్యాక్సిన్ ప్రయోగాలు చివరి దశకు చేరుకున్న వేళ పంపిణీకి సంబంధించిన సన్నాహకాలపై కేంద్ర ప్రభుత్వం దృష్టి సారించింది. ఈ క్రమంలో ప్రధాని మోదీ నేరుగా టీకా ప్రయోగాల పురోగతిని పరిశీలించనున్నారు. అయితే.. జీహెచ్‌ఎంసీ ఎన్నికల ప్రచారానికి సంబంధించిన కార్యక్రమాల్లో మోదీ పాల్గొంటారా? లేదా అనే అంశంపై స్పష్టత రావాల్సి ఉంది. గ్రేటర్ ఎన్నికల పోలింగ్ డిసెంబర్ 1న జరగనుంది. నవంబర్ 29 సాయత్రం ఎన్నికల ప్రచారానికి తెర పడుతుంది.

Also Read: వ్యాక్సిన్ పంపిణీకి ఏర్పాట్లు చేసుకోండి..

Don't Miss: Oxford వ్యాక్సిన్: తొలి డోసుతోనే 70% సమర్థంగా.. సూపర్