ప్రభుత్వ ఉన్నతాధికారిణి వీడియో కాన్ఫరెన్స్.. మధ్యలో పోర్న్ క్లిప్

సాక్షాత్తు ప్రభుత్వ కార్యదర్శి నిర్వహించిన వీడియో కాన్ఫరెన్స్‌లో పోర్న్ క్లిప్ దర్శనమిచ్చిన ఘటన రాజస్థాన్‌ సచివాలయంలో చోటుచేసుకుంది. రాజస్థాన్ ఆహార, పౌరసరఫరాల శాఖ రివ్యూ మీటింగ్‌లో ఒక్కసారిగా బూతు చిత్రాలు దర్శనమీయడంతో అధికారులంతా విస్తుపోయారు. సాంకేతిక విభాగానికి చెందిన సిబ్బంది ఏం జరుగుతోందో అర్థంకాక తలలు పట్టుకున్నారు. మొత్తానికి హుటాహుటిన వీడియో కాన్ఫరెన్స్‌ను ఆపేసి తప్పును సరిదిద్దారు. ఈ తప్పిదాన్ని సీరియస్‌గా తీసుకున్న పౌరసరఫరాల శాఖ కార్యదర్శి ముగ్ధా సింగ్ ఘటనపై విచారణకు ఆదేశించారు.

మంగళవారం ఆహార, పౌరసరఫరాల శాఖకు చెందిన జిల్లాధికారులతో ముగ్ధా సింగ్ సచివాలయం నుంచి వీడియో కాన్ఫరెన్స్ నిర్వహించారు. మొత్తం 33 జిల్లాలకు చెందిన అధికారులతో పాటు సెక్రటేరియట్‌లోని ఉన్నతాధికారులు ఈ వీడియో కాన్ఫరెన్స్‌లో పాల్గొన్నారు. కాన్ఫరెన్స్‌ మధ్యలో అకస్మాత్తుగా టీవీల్లో పోర్న్ క్లిప్ ప్లే అయ్యింది. దీంతో అధికారులు ఒక్కసారిగా షాక్‌కు గురయ్యారు. రెండు నిమిషాల పాటు ఈ క్లిప్ ప్లే కావడం గమనార్హం. వెంటనే స్పందించిన టెక్నికల్ టీమ్ వీడియో కాన్ఫరెన్స్‌ను ఆపేశారు. తప్పును సరిదిద్ది మళ్లీ మొదలుపెట్టారు.

ఈ ఘటనపై ముగ్ధా సింగ్ న్యూస్ ఏజెన్సీ ఐఏఎన్ఎస్‌తో మాట్లాడారు. వీడియో కాన్ఫరెన్స్ మధ్యలో అసభ్యకర వీడియో దర్శనమిచ్చిందన్నారు. దీనిపై స్థానిక నేషనల్ ఇన్ఫర్మేటిక్ సెంటర్ (NIC) డైరెక్టర్‌ను వివరణ కోరామన్నారు. ఘటనపై వెంటనే దర్యాప్తు జరిపి నివేదికను అందజేయాలని ఆదేశించామని చెప్పారు. దీనికి బాధ్యులైనవారిపై కఠిన చర్యలు తీసుకుంటామని స్పష్టం చేశారు.