అరుణాచల్ ప్రదేశ్ సీఎంని సస్పెండ్ చేసిన పీపీఏ

అరుణాచల్ ప్రదేశ్‌లో పీపుల్స్ పార్టీ ఆఫ్ అరుణాచల్ ప్రదేశ్ (పీపీఏ) నేతృత్వంలో వున్న ప్రభుత్వం మరోసారి సంక్షోభంలో పడింది. పార్టీ వ్యతిరేక కార్యకలాపాలకు పాల్పడుతున్నారంటూ... గురువారం సాయంత్రం ఆ రాష్ట్ర ముఖ్యమంతి పెమా ఖండు, ఉప ముఖ్యమంత్రి చౌనా మై లతో సహా మరో ఐదుగురు పీపీఏ ఎమ్మెల్యేలని పార్టీ తాత్కాలికంగా సస్పెండ్ చేయడంతో ఈ కొత్త సంక్షోభం తలెత్తింది. సస్పెండ్ అయిన ఎమ్మెల్యేలలో జంబీ టషీ, సిటీ మై, పీడీ సోనా, జిగ్ను నమ్చూమ్, కమ్లుంగ్ మొస్సాంగ్ ఉన్నారు.

గతేడాది ఆరంభం నుంచే అరుణాచల్ ప్రదేశ్ రాజకీయాలు ఎప్పటికప్పుడు ఏదో ఓ అనుకోని పరిణామంతో రాజకీయ సంక్షోభాన్ని ఎదుర్కొంటూనే వున్నాయి. నబం టుకీ స్థానంలో ఈ ఏడాది జులై 16న సీఎంగా బాధ్యతలు చేపట్టిన పెమా ఖండుని ఇప్పుడు పార్టీ ఆ స్థానం నుంచి తప్పించడంతో అరుణాచల్ ప్రదేశ్ రాజకీయాలు మరోసారి చర్చనియాంశమయ్యాయి. ఇదిలావుంటే, అదునుకోసం ఎదురుచూస్తున్న కాంగ్రెస్ పార్టీ కూడా మధ్యంతర ఎన్నికలు వస్తే ఎదుర్కోవడానికి సిద్ధంగా వుండాలని పార్టీ కార్యకర్తలు, శ్రేణులని ఆదేశించింది.