ట్రిపుల్ తలాక్‌కు రాష్ట్రపతి ఆమోదముద్ర.. చట్టంగా మారిన బిల్లు

కేంద్ర ప్రభుత్వం అత్యంత ప్రతిష్టాత్మకంగా రూపొందించిన ట్రిపుల్ తలాక్ బిల్లు.. చట్టరూపం దాల్చింది. ఇటీవలే పార్లమెంట్ ఉభయ సభలు ఆమోదించిన ఈ బిల్లుకు తాజాగా గురువారం (ఆగస్టు 1) రాష్ట్రపతి రామ్‌నాథ్ కోవింద్ ఆమోదం తెలిపారు. ముస్లిం మహిళల వివాహ హక్కుల పరిరక్షణ బిల్లు 2019 పేరుతో రూపొందించిన ఈ బిల్లుకు రాష్ట్రపతి ఆమోదముద్ర వేసినట్లు ప్రభుత్వం ఓ నోటిఫికేషన్ విడుదల చేసింది. గత మంగళవారం ట్రిపుల్ తలాక్ నిషేధ బిలు రాజ్యసభ ఆమోదం పొందగానే లింగ సమానత్వానికి గొప్ప మైలురాయిగా నిలిచిపోతుందని రాష్ట్రపతి ట్విట్టర్‌లో ప్రశంసించిన విషయం తెలిసిందే.

ట్రిపుల్ తలాక్ నిషేధ చట్టం ప్రకారం ముస్లిం మహిళలకు మూడుసార్లు తలాక్ చెప్పడాన్ని క్రిమినల్ నేరంగా పరిగణిస్తారు. తలాక్ చెప్పి విడాకులు ఇచ్చే భర్తలకు మూడేళ్లపాటు జైలు శిక్ష విధిస్తారు. ముస్లిం మహిళల పాలిట శాపంగా మారిన ట్రిపుల్ తలాక్‌ను రద్దు చేస్తూ రాజ్య సభ గత మంగళవారం ఆమోదం తెలిపింది. రాజ్యసభలో నిర్వహించిన ఓటింగ్‌లో 99-84 ఓట్లతో బిల్లుకు ఆమోదం లభించింది. ట్రిపుల్ తలాక్ రద్దు బిల్లు జులై 25న లోక్‌స‌భ‌ ఆమోదం పొందిన విషయం తెలిసిందే. తాజాగా రాష్ట్రపతి కూడా ఆమోదం తెలపడంతో ప్రస్తుతం ఉన్న ఆర్డినెన్స్ స్థానంలో చట్టంగా రూపుదిద్దుకుంది.