వార్ వన్‌సైడే: ‘రాష్ట్రపతి’ ఫలితం నేడే!

కేవలం ఎన్డీయే కూటమిలోని పార్టీలు మాత్రమే గాక, ఎన్డీయేతర, తటస్థ పార్టీలు కూడా భారతీయ జనతా పార్టీ అభ్యర్థి రామ్‌నాథ్ కోవింద్‌కు మద్దతు పలికినప్పుడే ఆయన విజయం ఖాయమైంది. రాష్ట్రపతి ఎన్నికల్లో ఆయనే విజయం సాధిస్తారని.. యూపీఏ తరపు అభ్యర్థి మీరాకుమార్ పోటీ కేవలం నామమాత్రమే అని క్లారిటీ వచ్చింది. అలాంటి పరిస్థితుల నడుమ సాగిన రాష్ట్రపతి ఎన్నిక ఫలితం నేడు వెల్లడికానున్నాయి. ఉదయం పదకొండు గంటల నుంచి ఓట్ల లెక్కింపు ప్రారంభం కానుంది.

ఈ ఎన్నికలో ఏకంగా 99శాతం పోలింగ్ నమోదైంది. బ్యాలెట్ పద్ధతిలో ఓటింగ్ జరిగింది. దేశ రాజధాని వేదికగా జరిగే కౌంటింగ్ మొత్తం ఎనిమిది రౌండ్లలో పూర్తి అవుతుందని ఈసీ ప్రకటించింది.

ఈ ఎన్నిక ఫలితం ఏ మాత్రం ఉత్కంఠభరితం కాదు. ప్రథమపౌరుడిగా రామ్‌నాథ్ కోవింద్ ఎన్నికవ్వడం లాంఛనమే. ఈ రోజే అందుకు సంబంధించిన ప్రకటన రావడమే ఆసక్తికరం. నూతన రాష్ట్రపతి ఈ నెల 25వ తేదీన ప్రమాణస్వీకారం చేయనున్నారు. మరోవైపు ఉపరాష్ట్రపతి ఎన్నిక ఆగస్టు ఐదో తేదీన జరగనుంది