వ్యక్తిగత గోప్యత ప్రాథమిక హక్కే: సుప్రీం

ఆధార్ అనుసంధానం విషయంలో కేంద్రానికి భారీ షాక్ తగిలింది. సంక్షేమ కార్యక్రమాల అమలులో ఆధార్ అనుసంధానం తప్పని సరి చేస్తూ కేంద్రం తీసుకున్న నిర్ణయంపై దాఖలైన పిటిషన్ ను విచారించిన సర్వోన్నత న్యాయస్థానం సంచలన తీర్పును వెలువరించింది. వ్యక్తిగత గోప్యత రాజ్యాంగపరమైన హక్కే అంటూ 9 మంది సభ్యులతో కూడిన ధర్మాసనం ఏకగ్రీవంగా అమోదిస్తూ కీలక తీర్పునిచ్చింది. ఆధార్ కార్డుతో అనుసంధానం వ్యక్తిగత గోప్యత హక్కును హరిస్తోందని ధర్మాసనం స్పష్టం చేసింది. దీంతో పాన్ కార్డు, బ్యాంకు ఖాతాలకు ఆధార్‌ను అనుసంధానించాలన్న కేంద్రం నిర్ణయానికి తీవ్ర ప్రతిబంధకం ఏర్పడింది.

1957 నాటి తీర్పును సుప్రీంకోర్టు మరోసారి సమీక్షించింది. వ్యక్తిగత గోప్యత రాజ్యాంగం కల్పించిన ప్రాధమిక హక్కు అని స్పష్టం చేసింది. రాజ్యాంగం కల్పించిన ప్రాథమిక హక్కును కాలరాసే అధికారం పార్లమెంటుకు లేదని పేర్కొంది. బ్యాంకు ఖాతా, పాన్ కార్డు లాంటి వాటికి ఆధార్ అనుసంధానం చేయడం వ్యక్తిగత గోప్యత హక్కుకు భంగం కలిగించడమేనని తెలిపింది. అలా అనుసంధానించడం వల్ల వ్యక్తిగత గోప్యత ఉండదని, అతడి సమాచారాన్ని ఎవరైనా తెలుసుకోవచ్చని ధర్మాసనం అభిప్రాయపడింది. ఆధార్ అనుసంధాన విధానం ప్రైవసీని కాలరాస్తుందని వ్యాఖ్యనించింది. రాజ్యాంగంలోని ఆర్టికల్ 21 ప్రకారం ఇది వ్యక్తిగత స్వేచ్ఛను కాలరాయడమేనని కోర్టు ప్రకటించింది.

సుప్రీంకోర్టు తీర్పుపై కేంద్రం స్పందించాల్సి ఉంది. ఈ తీర్పు వల్ల ఆధార్‌కు దెబ్బ తగిలింది. ​ అంతకు ముందు ప్రజల వేలిముద్రల నమూనాలు, వారి ఐరిస్ స్కాన్ ఇవ్వడం వల్ల వ్యక్తిగత గోప్యత ఉల్లంఘించడం కాదని సుప్రీంకోర్టు ఒప్పించాలని కేంద్రం భావించింది. గతంలో ఎంపీ శర్మ కేసులో ఎనిమిది న్యాయమూర్తుల ధర్మాసనం, ఖరక్‌సింగ్ కేసులో ఆరుగురు న్యాయమూర్తుల ధర్మాసనం వ్యక్తిగత గోప్యత ప్రాధమిక హక్కు కాదంటూ పేర్కొన్నాయి. దీన్ని ఆధారంగా చేసుకుని అటార్నీ జనరల్ వేణుగోపాల్ కేంద్రం తరఫున వాదనలు వినిపించారు.