ఘోర విషాదం: కాలువలో పడిన బస్సు.. 22 మంది మృతి

కర్ణాటకలో ఘోర విషాదం చోటుచేసుకుంది. ఓ ప్రైవేటు స్కూల్ బస్సు కావేరీ నది వీసీ కెనాల్‌లో పడిన ఘటనలో 22 మంది ప్రాణాలు కోల్పోయారు. మాండ్య జిల్లాలోని పాండవపుర సమీపంలో శనివారం మధ్యాహ్నం 12 గంటల సమయంలో ఈ ఘటన జరిగింది. మృతి చెందినవారిలో ఎక్కువ మంది స్కూలు పిల్లలు, మహిళలే ఉన్నారు. మృతుల సంఖ్య మరింత పెరిగే అవకాశం ఉంది.
ఈ ఘటనపై జిల్లా ఇన్‌ఛార్జి మంత్రి సీఎస్ పుట్టరాజు టైమ్స్ ఆఫ్ ఇండియాతో మాట్లాడారు. మొత్తం 22 మృతదేహాలను కాలువ నుంచి వెలికితీసినట్లు చెప్పారు. ప్రమాద సమయంలో ఒక విద్యార్థి బస్సులో నుంచి దూకేశాడని, అతనొక్కడే ప్రాణాలతో బయటపడ్డాడని మంత్రి తెలిపారు. మృతుల సంఖ్య మరింత పెరిగే అవకాశం ఉందని వెల్లడించారు. బస్సును కాలువ నుంచి బయటికి తీసే ప్రయత్నం చేస్తున్నామన్నారు. ఘటనపై విచారణ చేపట్టాలని ఇప్పటికే పోలీసు వ్యవస్థను ఆదేశించినట్లు తెలిపారు. ప్రస్తుతం మాండ్యలో ఉన్న కర్ణాటక ముఖ్యమంత్రి హెచ్‌డీ కుమారస్వామి సంఘటనా స్థలాన్ని పరిశీలించే అవకాశముంది.