ఎంపీకి ప్రైవేటు ఎయిర్ లైన్స్ సంస్థల వార్నింగ్ ?

ఎయిర్ ఇండియా ఉద్యోగి శివ్‌కుమార్‌పై చేయి చేసుకున్న శివసేన ఎంపీ రవీంద్ర గైక్వాడ్ ఇకపై ఇండియాలో ఫ్లైట్‌లో తిరగడం కష్టమేనా అంటే, అవుననే అంటున్నాయి ప్రైవేట్ ఎయిర్ లైన్స్ సంస్థలు. రవీంద్ర గైక్వాడ్‌ని తమ ఎయిర్ లైన్స్‌కి చెందిన విమానాలు ఎక్కకుండా ఏ మేరకు చర్యలు తీసుకోవచ్చో అనే అవకాశాన్ని పరిశీలిస్తోంది ది ఫెడరేషన్ ఆఫ్ ఇండియన్ ఎయిర్ లైన్స్. ప్రస్తుతం ది ఫెడరేషన్ ఆఫ్ ఇండియన్ ఎయిర్ లైన్స్ సంస్థలో ఇండిగో, జెట్ ఎయిర్ వేస్, స్పైస్ జెట్, గో ఎయిర్ వంటి సంస్థలు సభ్యత్వం కలిగి వున్నాయి. ఈ ఫెడరేషన్ తీసుకునే నిర్ణయం కూడా ఇంకాసేపట్లోనే వెలువడే అవకాశం వున్నట్టు తెలుస్తోంది.

కొన్నేళ్ల క్రితమే ఎయిర్ ఇండియా ఈ ఫెడరేషన్ నుంచి నిష్క్రమించింది. తరచుగా ప్రభుత్వం తీసుకుంటున్న నిర్ణయాలు, విధి, విధానాలని ఫెడరేషన్ వ్యతిరేకిస్తుండగా.. ప్రభుత్వానికే చెందిన ఎయిర్ ఇండియా ప్రభుత్వం నిర్ణయాలని వ్యతిరేకించలేకపోవడమే ఈ నిష్క్రమణకి కారణమైంది. అయితే, ఎయిర్ ఇండియా సైతం ప్రత్యేకంగా రూపొందించే నో-ఫ్లై లిస్ట్ జాబితాలో గైక్వాడ్‌కి కూడా చోటు దక్కే అవకాశం లేకపోలేదని సమాచారం.

ఈ ఘటనపై స్పైస్ జెట్ చైర్మన్ అజయ్ సింగ్ మాట్లాడుతూ... విమానాల్లో వికృత చేష్టలకి పాల్పడేవారి వల్ల విమానం సిబ్బందికేకాకుండా, ప్రయాణికుల భద్రతకి కూడా ముప్పు ఏర్పడే ప్రమాదం వుందని, అందువల్లే తాము నో-ఫ్లై జాబితాకి మద్దతు పలుకుతున్నట్టు తెలిపారు.