మలుపు తిప్పిన పెళ్లి.. నెల రోజుల్లోనే ప్రైవేట్ టీచర్ నుంచి నగరపాలక ఛైర్‌పర్సన్‌గా!

రాంపూర్‌కు చెందిన మమూన్ షాను పెళ్లాడటంతో సనా ఖానం జీవితం ఒక్కసారిగా మారిపోయింది. అయితే ఇది ఏదో ముందే అనుకున్న వివాహం కాదు. రాంపూర్ నగరపాలిక పరిషత్ ఎన్నికల్లో ఛైర్‌పర్సన్‌ పదవి ఈసారి మహిళలకు రిజర్వ్ అయి ఉంది. నగరపాలక ఛైర్‌పర్సన్‌గా మమూన్ షా పోటీ చేయాలని భావించినా.. దాన్ని మహిళలకు రిజర్వ్ చేయడంతో వెంటనే పెళ్లి చేసుకోవాలని నిశ్చయించుకున్నాడు. ఏప్రిల్ 13 న వీరు పెళ్లి చేసుకోవాలని నిర్ణయించుకున్నారు. వెంటనే రెండు రోజుల్లోనే అంటే ఏప్రిల్ 15 న వివాహం చేసుకున్నారు. పెళ్లి జరిగిన రెండు రోజులకు.. ఏప్రిల్ 16 న నగరపాలక పరిషత్ ఎన్నికల్లో సనా ఖానం నామినేషన్ వేశారు. మే 13 న ఆమె ఛైర్‌పర్సన్‌గా ఎన్నికయ్యారు. ఇవన్నీ చకచకా జరిగిపోయాయి.

రాంపూర్ నగరపాలిక పరిషత్‌ ఛైర్‌పర్సన్ పదవి కోసం తాము పెళ్లి చేసుకున్నట్లు సనా ఖానం వెల్లడించారు. పెళ్లి జరిగినప్పుడు అది తమకు పవిత్రమైన రంజాన్ మాసం అని తెలిపారు. ఈ పెళ్లిని దేవుడు ముందుగానే నిర్ణయించాడని సనా ఖానం చెప్పారు. ఎన్నికల ప్రచారంలో భాగంగా తాను మెుత్తం ప్రజల్లో తిరిగినట్లు ఆమె వివరించారు. ఆ సమయంలో ప్రజల సమస్యలను చాలా దగ్గరి నుంచి చూశానని.. ఇప్పుడు ఛైర్‌పర్సన్‌గా ఎన్నికైనందున వాటిని సాధ్యమైనంత త్వరగా పరిష్కరించేందుకు కృషి చేస్తానని తెలిపారు.

రాంపూర్ నగరపాలక పరిషత్ ఎన్నికల్లో తాను గెలుపొందడం పట్ల తాను పనిచేసిన పాఠశాల విద్యార్థులు ఎంతో సంతోషంగా ఉన్నారని సనా ఖానం అన్నారు. తనకు మద్దతిచ్చి గెలిపించినందుకు ప్రజలకు కృతజ్ఞతలు తెలిపారు. పరిస్థితులు కఠినంగా ఉన్నా.. తన భర్త మమూన్ పక్కన ఉన్నారని.. ప్రజల మద్దతుతో తాము విజయం సాధించామని తెలిపారు. మే 13 న ఆమె ఛైర్‌పర్సన్‌గా ఎన్నికయ్యారు. ఆమ్ ఆద్మీ పార్టీ తరఫున ఈ ఎన్నికల్లో పోటీ చేసిన సనా ఖానం 43,121 ఓట్లు సాధించారు. తన సమీప ప్రత్యర్థి బీజేపీకి చెందిన మసరత్ ముజీబ్ 32,173 ఓట్లతో రెండో స్థానంలో నిలిచారు. సమాజ్ వాదీ పార్టీ నాయకుడు, మాజీ ఎంపీ ఆజం ఖాన్‌కు కంచుకోటగా భావించే రాంపూర్ జిల్లాలో ఆ పార్టీకి చెందిన ఫాతిమా జబీ 16,273 ఓట్లతో మూడో స్థానంలో నిలిచారు.

గత 20 ఏళ్లుగా తాను సామాజిక సేవలో ఉన్నానని.. మమూన్ షా చెప్పారు. రాంపూర్ నగరంలో పోలియో నిర్మూలనకు కృషి చేసినట్లు వివరించారు. గతంలో రాంపూర్‌ నగర కాంగ్రెస్‌ అధ్యక్షుడిగా ఉన్న మమూన్ షా ఇటీవలే ఆమ్‌ ఆద్మీ పార్టీలో చేరారు. ప్రజలు సంక్షోభ సమయంలో ఉన్నపుడు వారితో ఉన్నందుకు తనను వారు ఆదరించి తనకు మద్దతు పలికారని 45 ఏళ్ల మమూన్ షా తెలిపారు. గత 40 ఏళ్లలో ఆజంఖాన్‌ చెప్పిన వారికే ఓటు వేసిన ప్రజలు ఈసారి తమకు ఓట్లు వేశారని అన్నారు. రాంపూర్‌ నగరపాలిక పరిషత్ ఎన్నికలకు మే 4న మొదటి దశ పోలింగ్ జరగగా.. మే 13న ఫలితాలు వెలువడ్డాయి.