ఇది బరాత్ కాదు.. బ్యాంక్ ఉద్యోగుల ధర్నా

ఇది పెళ్లి బరాత్ కాదు, ఎన్నికల సభ అంతకన్నా కాదు. కేంద్ర ప్రభుత్వ నిర్ణయాన్ని వ్యతిరేకిస్తూ బ్యాంకు ఉద్యోగులు చేపట్టిన ఆందోళన కార్యక్రమంలోని దృశ్యాలివి. బ్యాంకుల ప్రైవేటీకరణ నిర్ణయానికి వ్యతిరేకంగా చేపట్టిన ఈ ఆందోళనలో పురుషులతో పాటు మహిళా ఉద్యోగులు కూడా ఉత్సాహంగా పాల్గొన్నారు. రెండు రోజుల నిరసన కార్యక్రమాల్లో భాగంగా తొలి రోజైన సోమవారం (మార్చి 15) ‘బ్యాంక్‌ల బంద్’ విజయవంతమైంది.

తెలుగు రాష్ట్రాల్లోనూ ఉద్యోగులు పెద్ద సంఖ్యలో ఈ నిరసన కార్యక్రమాల్లో పాల్గొన్నారు. ఓ చోట జరిగిన నిరసన కార్యక్రమంలో మహిళా ఉద్యోగులు కూడా పాటలకు లయబద్దంగా పురుష ఉద్యోగులతో కలిసి డాన్స్ చేశారు. పురుషులు వారికి మరీ దగ్గరగా రాకుండా ఓ వ్యక్తి చేతులు అడ్డంగా పెట్టి నిల్చున్న దృశ్యాలను వీడియోలో గమనించవచ్చు.

బ్యాంకుల ప్రైవేటీకరణతో తమకే కాదు, సామాన్యులకు కూడా అన్యాయం జరుగుతుందని ఉద్యోగులు పేర్కొన్నారు. దేశవ్యాప్తంగా 10 లక్షల ఉద్యోగులు ఈ నిరసన కార్యక్రమాల్లో పాల్గొన్నట్లు యునైటెడ్ ఫోరం ఆఫ్ బ్యాంక్ యూనియన్స్ (UFBU) సభ్యులు తెలిపారు. ఉన్నత స్థానాల్లో ఉన్న ఉద్యోగులు మినహా మిగిలిన వారందరూ ధర్నాలో పాల్గొన్నారని అన్నారు. తొమ్మిది బ్యాంక్ సంఘాలతో కలిసి యూఎఫ్‌బీయూ సంఘం ఏర్పడింది.

మరో రెండు బ్యాంకులను ప్రైవేటీకరణ చేస్తామని ఆర్థిక మంత్రి నిర్మలా సీతారామన్ తన బడ్జెట్ ప్రసంగంలో తెలిపారు. బ్యాంక్ ఉద్యోగులు ఈ నిర్ణయాన్ని తీవ్రంగా వ్యతిరేకిస్తున్నారు. సోమవారం నాటి ఆందోళన కారణంగా ప్రధాన బ్యాంకులన్నింటిలో కార్యకలాపాలు నిలిచిపోయాయి. నగదు ఉపసంహరణ, డిపాజిట్, చెక్కుల క్లియరింగ్ తదితర సర్వీసులన్నింటికీ బ్రేక్ పడింది. దీంతో కస్టమర్లు ఇబ్బందులు పడ్డారు. ఇప్పటికే రెండు రోజులు (రెండో శనివారం, ఆదివారం) సెలవుతో గడిచిపోగా.. మరో రోజు ధర్నా కొనసాగనుండటంతో పలువురిలో ఆందోళన నెలకొంది.

Also Read:

✦ జాతీయ జెండాను పాకిస్థాన్‌లో ఎగరేయాలా..?

✦ రైలెక్కుతూ పట్టుతప్పిన మహిళ.. షాకింగ్ వీడియో

✦ ఈసారి తమిళనాడు సీఎం పీఠం ఎవరిది.. టైమ్స్ నౌ సర్వే, వార్ వన్‌సైడ్