నోట్లు రద్దుకు 30 రోజులు..అయినా కొనసాగుతున్న కష్టాలు

పెద్ద నోట్లను రద్దు చేసి నెల రోజులు అవుతున్నా దేశంలో కరెన్సీ కష్టాలు కొనసాగుతూనే ఉన్నాయి. పాత నోట్లకు కొత్త నోట్లు ఇచ్చే ప్రక్రియ సామాన్యులకు మినహాయిస్తే షరా మామూలుగానే నల్లబాబులకు మాత్రమే నల్లేరుమీద నావలా సాఫీగా సాగిపోతోంది. దేశంలో వివిధ ప్రాంతాల్లో నల్ల కుబేరుల వద్ద కోట్లాదిగా దొరుకుతున్న సరికొత్త రూ.2వేలు, రూ.500 నోట్లు దేశ ప్రజానీకాన్ని విస్తుగొలుపుతున్నాయి. ఈ నేపథ్యంలో సామాన్యుల కష్టాలకు ముగింపు ఎప్పుడంటూ విపక్షాలు మళ్లీ ఆందోళనకు దిగాయి.

మోడీ ప్రభుత్వం పెద్ద నోట్లు రద్దు చేసి 30రోజులు గడిచిన సందర్భంగా పార్లమెంట్ ఆవరణలో విపక్షాలు ఆందోళన నిర్వహించాయి. నోట్ల రద్దు నిర్ణయాన్ని తప్పుపడుతూ బ్లాక్ డే నిర్వహించాయి. ఈ కార్యక్రమంలో కాంగ్రెస్ జాతీయ ఉపాధ్యక్షుడు రాహుల్ గాంధీ కూడా పాల్గొన్నారు. ఈ సందర్భంగా రాహుల్ మరోమారు మోడీ నిర్ణయాన్ని అనాలోచితమైనదిగా పేర్కొన్నారు. మోడి నిర్ణయాల వల్ల ప్రజలు నానా కష్టాలు పడుతున్నారన్నారు.