రాహుల్ జాకెట్ రేటుపై రచ్చ!

కేంద్రంలో అధికార భారతీయ జనతా పార్టీ, ప్రతిపక్ష కాంగ్రెస్ పార్టీల మధ్య ఇప్పుడు కొత్త వ్యవహారంపై రచ్చ జరుగుతోంది. ఇది ఏఐసీసీ ప్రెసిడెంట్ రాహుల్ గాంధీ ధరించిన జాకెట్ విషయంలో. ఇటీవలే మేఘాలయ పర్యటన సందర్భంగా రాహుల్ ధరించిన చలికోటు ధర అక్షరాలా డెబ్బై వేల రూపాయలు అని భారతీయ జనతా పార్టీ అంటోంది. రాహుల్ ధరించింది బ్రిటిష్ లగ్జరీ ఫ్యాషన్ బ్రాండ్ బుర్ బెరీ కంపెనీ జాకెట్ అని బీజేపీ అంటోంది. దాని ధర డెబ్బై వేల వరకూ ఉందని కమలనాథులు అంటున్నారు.

బీజేపీ రాహుల్ ధరించిన జాకెట్ ధరను ప్రస్తావించడానికి ఒక కారణం ఉంది. ఇది వరకూ ప్రధానమంత్రి మోడీ.. ఖరీదైన సూటూబూటు వేసుకుంటున్నారని రాహుల్ గాంధీ వ్యాఖ్యానించారు. మోడీ ధరించే సూటు విలువ లక్షల రూపాయల్లో ఉంటుందని రాహుల్ గాంధీ ఇది వరకూ విమర్శలు చేశారు. ఈ నేపథ్యంలో ఈ సారి బీజేపీ వాళ్లు ఎదురుదాడి చేస్తున్నారు.

అయితే.. దీనికి కాంగ్రెస్ పార్టీ కూడా ప్రతిదాడి చేస్తోంది. రాహుల్ గాంధీ ధరించిన చలికోటు ధర డెబ్బై వేల రూపాయలు అనే ప్రచారాన్ని ఆ పార్టీ నేత రేణుకాచౌదరి ఖండించారు. అలాంటి జాకెట్ ఏడు వందల రూపాయలకే వస్తుందని.. బీజేపీ నేతలకు ఆ ధరతో తనే కొనిస్తాను అని ఆమె అంటున్నారు. పంజాబ్ కు చెందిన కాంగ్రెస్ నేత సిద్ధూ ఈ అంశంపై స్పందిస్తూ.. రాహుల్ గాంధీ ఆ కోటును కొనుక్కొన్నప్పుడు బీజేపీ నేతలు అక్కడేమైనా ఉన్నారా? అని ప్రశ్నించారు.