మాజీ కల్నల్ ఇంట్లో 44 తుపాకులు, 117 కిలోల జంతు మాంసం

ఉత్తర్ ప్రదేశ్‌లోని మీరట్‌లో ఓ మాజీ కల్నల్‌తోపాటు అతడి తనయుడి ఇంట్లో డైరెక్టరేట్ ఆఫ్ రెవిన్యూ ఇంటెలీజెన్స్, వన్య సంరక్షణ విభాగం, స్థానిక పోలీసులు జరిపిన సోదాల్లో రూ. 1 కోటి నగదు, 44 తుపాకులు, వాటికి అవసరమైన బుల్లెట్లు, మందు గుండు సామాగ్రి, 117.5 కిలోల వన్యప్రాణుల మాంసం, జంతు చర్మాలు, కలేబరాలు బయటపడ్డాయి. ఈ దాడులతో అక్రమంగా ఆయుధాల సరఫరా, వన్యప్రాణుల వేటకు సంబంధించిన పెద్ద రాకెట్ గుట్టురట్టయింది.

1971 యుద్ధం, ఆపరేషన్ బ్లూ స్టార్‌లో పాల్గొన్న మాజీ కల్నల్ దేవేంద్ర కుమార్ బిష్నోయి, అతడి కుమారుడైన జాతీయ స్థాయి షూటర్ ప్రశాంత్ బిష్నోయి నివాసాల్లో తనిఖీలు జరిపిన అధికారులు అక్కడ విదేశీ పరిజ్ఞానంతో తయారైన అత్యాధునిక తుపాకులు, 50,000 క్యాట్రిడ్జెస్, చిరుతపులి, కృష్ణ జింకల చర్మాలు, కొమ్ములతోవున్న 8 దుప్పి పుర్రెలు, మాంసాన్ని స్వాధీనం చేసుకున్నారు. మూడు విభాగాలకి చెందిన అధికారులు దాదాపు 17 గంటలపాటు ఈ సోదాలు జరిపారు.

సోదాల అనంతరం అటవీ శాఖ అధికారులు మాజీ కల్నల్, అతడి కుమారుడిపై వన్యప్రాణి సంరక్షణ చట్టాల కింద కేసు నమోదు చేశారు. 72 ఏళ్ల దేవేంద్ర కుమార్ బిష్నోయి ఆర్మీ నుంచి పదవీ విరమణ పొందిన తర్వాత ఉత్తర్ ప్రదేశ్ రాష్ట్ర సర్వీస్‌లోనూ మరో 12 ఏళ్ల పాటు పనిచేశారు. ఇదిలావుంటే, పూర్తి స్థాయి సోదాలపై ఢిల్లీ జోనల్ విభాగం డీఆర్ఐ అడిషనల్ డైరెక్టర్ రాజ్ కుమార్ దిగ్విజయ్ మాట్లాడుతూ... మీరట్, ఢిల్లీలలో జరిగిన తనిఖీల్లో కలిపి మొత్తం 100 వరకు అక్రమంగా దిగుమతి చేసుకున్న విదేశీ తుపాకులు, 2 లక్షల క్యాట్రిడ్జెస్‌ని స్వాధీనం చేసుకున్నామని తెలిపారు. ప్రస్తుతానికి ఇంకా అరెస్టులు ఏవీ జరగలేదు.