పోలీసులపై ఫేస్‌బుక్ పోస్ట్.. డిప్యూటీ జైలర్ సస్పెండ్

నక్సలిజం, గిరిజన యువతులపై పోలీసుల లైంగిక దాడులు తదితర అంశాలతో ప్రభుత్వానికి వ్యతిరేకంగా ఫేస్‌బుక్‌లో పోస్టు పెట్టిన డిప్యూటీ జైలర్‌ని సస్పెండ్ చేశారు. వివరాల్లోకి వెళ్తే.. ఛత్తీష్‌గఢ్‌లోని రాయ్‌పూర్ జైలు డిప్యూటీ జైలర్ వర్ష డోంగ్రే పోలీసులు, ప్రభుత్వానికి వ్యతిరేకంగా ఫేస్‌బుక్‌లో ఓ పోస్ట్ పెట్టారు. బస్తర్ జిల్లాలో గిరిజనుల భూములు లాక్కొని ప్రభుత్వం పెట్టుబడిదారీ విధానాన్ని ప్రోత్సహిస్తున్నంత కాలం అక్కడ నక్సలిజం ఆగదని పోస్టులో పేర్కొన్నారు.

ఇటీవల సుక్మా జిల్లాలో మావోయిస్టులు 25 మంది సీఆర్పీఎఫ్ జవాన్లను హతమార్చిన తరవాత వర్ష ఈ పోస్టు పెట్టారు. బస్తర్ జిల్లాలోని గిరిజన గ్రామాలు తగలబడిపోతున్నాయని, అక్కడి మహిళలు అత్యాచారాలకు గురవుతున్నారని ఆమె ఆరోపించారు. పోలీస్ స్టేషన్లలో గిరిజన యువతులను లైంగిక దాడులు జరిగిన సంఘటనలు తనకు తెలుసని పేర్కొన్నారు. దీంతో వర్ష ఫేస్‌బుక్ పోస్టుపై పెద్ద దుమారమే రేగింది. రాష్ట్ర ప్రభుత్వం, పోలీస్ శాఖ ఆమెపై ఆగ్రహం వ్యక్తం చేశాయి.

వర్ష పోస్టుపై విచారణ చేపట్టాలని సాక్షాత్తు ముఖ్యమంత్రి రమణ్ సింగ్ పోలీసు ఉన్నతాధికారులకు ఆదేశాలు జారీ చేశారు. జైళ్ల శాఖ డీఐజీ కె.కె.గుప్తా నేతృత్వంలోని టీం.. వర్ష డోంగ్రే పోస్టుపై విచారణ చేపట్టింది. వర్ష పోస్టును ఫేస్‌బుక్ నుంచి తొలగించారు. వర్ష క్రమశిక్షణరాహిత్యంతో వ్యవహరించారని తేల్చిన పోలీసు అధికారులు ఆమెపై సస్పెండ్ వేటు వేశారు.