నువెవ్వరూ..? తూత్తుకుడిలో రజనీకి యువకుడి ప్రశ్న!

సూపర్ స్టార్ రజినీకాంత్‌కు చేదు అనుభవం ఎదురైంది. తూత్తుకుడి ఘటనలో గాయపడి హాస్పిటల్లో చికిత్స పొందుతున్న వారిని పరామర్శించేందుకు వెళ్లిన ఆయన్ను ఓ యువకుడు ‘నువ్వెవరు?’ అని ప్రశ్నించాడు. దీనికి తలైవా బదులిస్తూ.. నేను రజనీకాంత్‌ను అని సమాధానం చెప్పాడు. ఈ వీడియో సోషల్ మీడియాలో వైరల్‌గా మారింది. తమిళనాట చిన్నపిల్లాడు కూడా రజనీని గుర్తుపడతాడు. అలాంటిది సూపర్ స్టార్‌ను నువ్వెవరని ఓ యువకుడు ప్రశ్నించడం.. అక్కడి ప్రజల ఆగ్రహానికి, ఆవేదనకు అద్దం పడుతోంది.

బుధవారం తూత్తుకుడి మెడికల్ కాలేజీ హాస్పిటల్‌లో చికిత్స పొందుతున్న వారిని రజినీకాంత్ పరామర్శించారు. వంద రోజులపాటు తూత్తుకుడిలో నిరసన ప్రదర్శనలు చేపట్టినప్పటికీ.. రజనీ ఒక్క రోజు కూడా ఆ విషయమై నోరు మెదపలేదు. రజనీ మక్కల్ మండ్రమ్ నేతలు కూడా బాధితులతో మాట్లాడలేదు. ఆ కోపమే రజనీ పర్యటన సమయంలో బయటపడింది.

రజనీని ప్రశ్నించిన యువకుణ్ని తూత్తుకూడికి చెందిన 21 ఏళ్ల కె.సంతోష్ రాజ్‌గా గుర్తించారు. బీకాం చదువుకున్న ఈ యువకుడు తూత్తుకుడి ప్రాంతంలోని కాలేజీ విద్యార్థులను కూడగట్టి.. స్టెరిలైట్ ప్లాంట్ మూసివేయాలంటూ పోరాటం చేశాడు. మే 22న కలెక్టరేట్‌ను ముట్టడించేందుకు వెళ్తుండగా.. పోలీసులు జరిపిన లాఠీఛార్జీలో అతడి తలకు గాయమైంది.