రాజకీయ పార్టీ కార్యక్రమంలో స్టార్ హీరోలు!

గత కొంత కాలంగా రాజకీయ ప్రకటనలతో ఆసక్తిని రేకెత్తిస్తున్న వాళ్లు రజనీకాంత్, కమల్ హాసన్. రజనీ కొత్త పార్టీని ఏర్పాటు చేసే అవకాశాలు మెండుగా ఉన్నాయి. అభిమానులతో సమావేశంలో ఆయన ఈ తరహా ప్రకటనలు చేశారు. ఇక ప్రత్యేకించి తమిళనాడులోని అధికార పార్టీని లక్ష్యంగా చేసుకున్నారు కమల్. జయలలిత మరణానంతరం కమల్ వాడీవేడీగా స్పందించడం మొదలుపెట్టారు. కమల్ వ్యాఖ్యలపై అన్నాడీఎంకే వాళ్లు పలుసార్లు మండిపడ్డారు కూడా.

మరి రాజకీయ వార్తల్లో నిలుస్తున్న ఈ ఇద్దరు సూపర్ స్టార్ లూ ఒక రాజకీయ పార్టీ కార్యక్రమంలో పాల్గొనడం విశేషం. ఈ హీరోలు డీఎంకే వేదికపై కనిపించారు. ఆ పార్టీ అధికారిక దినపత్రిక ‘మురసోలి’ ఆవిర్భవించి 75 సంవత్సరాలు పూర్తి అయిన నేపథ్యంలో నిర్వహించిన కార్యక్రమంలో కమల్, రజనీలు పాల్గొన్నారు. మురసోలి పత్రిక డీఎంకే అధికార పత్రిక, కరుణానిధి కుటుంబ ఆధ్వర్యంలో నడుస్తున్న పత్రిక. దానికి సంబంధించిన కార్యక్రమం కావడంతో దీనికి రాజకీయ రంగు సహజంగానే ఉంటుంది. ఇందులో కమల్, రజనీలు పాల్గొన్నారు.




ఈ సందర్భంగా కమల్ ప్రసంగించారు కూడా. అయితే రజనీకాంత్ మాత్రం ప్రసంగించ లేదు. అతిథిగా మాత్రమే హాజరయ్యారు. కమల్ మాట్లాడుతూ.. రాజకీయ ప్రవేశం గురించి స్పందించారు. ‘1983లోనే పార్టీలో చేరమని కరుణానిధి లేక రాశారు. అయితే అప్పుడు సమాధానం చెప్పలేకపోయాను. ఇన్నేళ్లూ కూడా సమాధానం చెప్పలేకపోయాను.. కానీ ఇప్పుడు తమిళ రాజకీయాల్లో కొత్త శకం నడుస్తోంది’ అని వ్యాఖ్యానించారు. తను ఒక పత్రిక నిర్వహించి కొన్నాళ్లకే మూత వేశాను అని, మురసోలి పత్రిక కార్యక్రమంలో పాల్గొనడం ఆనందంగా ఉందని అన్నారు.

గత కొంతకాలంగా కమల్ హాసన్ అన్నాడీఎంకేపై విమర్శలు చేస్తూ వస్తున్నారు. ప్రతిగా ఆ పార్టీ నేతలు కమల్ పై విమర్శలు చేయగా, కమల్ తరపున డీఎంకే నేత స్టాలిన్ గళం విప్పారు.