ఫ్యాన్స్.. ప్లీజ్‌ సీట్లు అడగొద్దు: రజనీకాంత్

రాజకీయ పార్టీ స్థాపనపై అభిమానులతో సుదీర్ఘంగా చర్చలు జరుపుతున్న తమిళ సూపర్ స్టార్ రజనీకాంత్ తాజాగా ఫ్యాన్స్‌కి ఓ విజ్ఞప్తి చేశారు. పార్టీలో చేరండి.. కానీ.. ఎన్నికల్లో సీట్లు మాత్రం అడగొద్దని కోరారు. రాష్ట్రంలోని అన్ని జిల్లాల్లోని అభిమాన సంఘాల నిర్వాహకులతో శనివారం ఆయన వీడియో కాన్ఫెరెన్స్ ద్వారా మాట్లాడారు. ఈ సందర్భంగా ప్రజలకు సేవ చేసేందుకు పార్టీలో చేరాలని సూచించిన రజనీకాంత్.. ఎవరు పోటీ చేయాలనే నిర్ణయాన్ని మాత్రం తానే తీసుకుంటానని వెల్లడించారు.

పార్టీ స్థాపన, సభ్యత్వ నమోదుపై అనుసరించాల్సిన వ్యూహాల గురించి ఫ్యాన్స్‌తో రజనీకాంత్ చర్చించారు. ప్రజలకి పార్టీ తరఫున సేవ చేయాలనే తలంపుతో పార్టీలో చేరాలని సూచించిన ఆయన ఎన్నికల్లో పోటీ చేసేందుకు ఎదురుచూస్తూ ఉండొద్దన్నారు. ఎన్నికలు వచ్చినప్పుడు ఎవరు పోటీచేయాలి..? ఎవరికి సీట్లివ్వాలి..? అనే నిర్ణయాన్ని అందరితో చర్చించి తానే తీసుకుంటానని అంతవరకూ సీట్ల కోసం దయచేసి అభిమానులు అడగొద్దని సూపర్ స్టార్ విజ్ఞప్తి చేశారు.