అప్పుడు అనుమతే దొరకలేదు.. ఇప్పుడు దర్జాగా అడుగు పెడతారు!

రాష్ట్రపతి అభ్యర్థిగా అకస్మాత్తుగా తెరపైకి వచ్చిన రామ్‌నాథ్ కోవింద్‌.. కొన్ని వారాల కింద‌ట ఓ వింత అనుభ‌వం ఎదుర్కొన్నారు. బీహార్ గ‌వ‌ర్న‌ర్‌ హోదాలో ఆయన మే 28న కుటుంబ స‌భ్యుల‌తో క‌లిసి హిమాచ‌ల్ ప్ర‌దేశ్ ప‌ర్య‌ట‌న‌కు వెళ్లారు. ఆ రాష్ట్ర గ‌వ‌ర్న‌ర్ ఆచార్య దేవ్‌వ్ర‌త్.. రామ్‌నాథ్‌కు మంచి మిత్రులట. షిమ్లాలోని ప్రముఖ పర్యాటక ప్రాంతాలన్నింటినీ వీక్షించిన రామ్‌నాథ్ చివరగా.. అక్క‌డి మ‌షోబా హిల్స్‌లో ఉన్న‌ రాష్ట్రపతి నిల‌యాన్ని సంద‌ర్శించ‌డానికి వెళ్లారు. షిమ్లాలో రాష్ట్ర‌ప‌తి కోసం వేస‌వి విడిది ఉన్న విష‌యం తెలిసిందే క‌దా. భారత ప్రెసిడెంట్ ఏటా చలికాలంలో హైద‌రాబాద్‌లోని రాష్ట్ర‌ప‌తి నిల‌యానికి ఎలా వ‌స్తారో.. అలాగే వేసవిలో కొన్ని రోజులు షిమ్లాకు వెళతారు. అయితే రామ్‌నాథ్ ముందస్తు అనుమతి తీసుకోకపోవడంతో.. ఓ రాష్ట్ర గ‌వ‌ర్న‌రే అయినా నిబంధ‌న‌ల ప్ర‌కారం అక్క‌డి సిబ్బంది ఆయణ్ని లోనికి అనుమతించలేదు. దీంతో ఆయన అక్కడి ‘కల్యాణి’ హెలీప్యాడ్, కొండ ప్రాంతాలను చూసి తిరుగు పయనమయ్యారు.

కోవింద్ ఎదుర్కొన్న ఈ వింత అనుభవం ఇప్పుడు దేశంలో హాట్ టాపిక్‌గా మారింది. ఎన్డీఏకు సంపూర్ణ మెజార్టీ ఉండటంతో రాష్ట్రపతిగా ఆయన ఎంపిక లాంఛనమే అని అందరూ భావిస్తున్నారు. రాష్ట్ర‌ప‌తిగా ఎంపికైన తర్వాత ఆయన ఏటా షిమ్లా విడిదికి రావాల్సిందే. అంటే.. ఇప్పుడు చూడటానికే అనుమతి దొరకని భవనంలో ఆయన దర్జాగా అడుగుపెట్టి సకల మర్యాదలను అందుకుంటారన్నమాట.

ఉన్నత పదవులు అనుభవించినా కోవింద్ ఎప్పుడూ సాదాసీదా వ్యక్తిలానే ఉంటారట. అధికారిక వాహనాలను సొంత పనుల కోసం వాడరట. షిమ్లా పర్యటనకు ఆయ‌న భార్య‌తో క‌లిసి అధికారిక వాహ‌నంలో వెళ్లగా.. మిగతా కుటుంబ స‌భ్యులు ప్రైవేట్ వెహికిల్స్‌లోనే వెళ్లారు. ఇలాంటి వ్యక్తి రాష్ట్ర‌ప‌తి పదవికి ఎంపికవనుండటం మంచి పరిణామమే కదా!