సొలిసిటర్ జనరల్ రంజిత్ రాజీనామా!

సొలిసిటర్ జనరల్ రంజిత్ కుమార్ శుక్రవారం తన పదవికి రాజీనామా చేశారు. వ్యక్తిగత కారణాలతోనే వైదొలుగుతున్నట్లు ఆయన తెలిపారు. కుటుంబ సభ్యులతో సమయం గడపాలని భావిస్తున్నందువల్లే రాజీనామా చేస్తున్నట్లు రంజిత్ చెప్పారు. ఒకే ఒక లైన్లో ఆయన తన రాజీనామా లేఖను పంపించడం గమనార్హం. ఈ ఏడాది జూన్లో ఆయన పదవి కాలాన్ని పొడిగించారు. అటార్నీ జనరల్‌గా ముకుల్ రోహత్గి రాజీనామా చేసిన కొద్ది నెలల్లో రంజిత్ కూడా రాజీనామా చేయడం గమనార్హం.

జూన్ 2014లో మోహన్ పరాశరన్ స్థానంలో సుప్రీం కోర్టు సీనియర్ అడ్వొకేట్ అయిన రంజిత్ కుమార్‌ను సొలిసిటర్ జనరల్‌గా నియమించారు. రంజిత్‌కు రాజ్యాంగ పరమైన విషయాల్లో లోతైన అవగాహన ఉంది. ప్రభుత్వం తనకు ఎంతగానో సహకరించిందని ఆయన టైమ్స్ ఆఫ్ ఇండియాకు తెలిపారు. ఆయన గతంలో గుజరాత్ ప్రభుత్వం తరఫున సోహ్రబుద్దీన్ షేక్ బూటకపు ఎన్‌కౌంటర్ కేసులో వాదించారు.