అకౌంట్ పోర్టబులిటీ: అదే నంబర్, నచ్చిన బ్యాంకు

ఇప్పటి వరకు మనకు మొబైల్ నంబర్ మార్చుకోకుండా టెలికాం ఆపరేటర్ (సదరు నెంబర్ కేటాయించే నెట్ వర్క్)ను మార్చుకునే వెసులుబాటు-పోర్టబులిటీ-ఉండేది. రానున్న రోజుల్లో ఇదే విధానం బ్యాంకు అకౌంట్ నెంబర్ మార్చుకోకుండా మనకు నచ్చిన బ్యాంకుకు మారే అవకాశం దక్కనుంది. అంటే సెల్ ఫోన్ నంబర్ కు ఉండే ‘పోర్టబులిటీ’ సౌకర్యం ఇకపై బ్యాంకు ఖాతాలకు వర్తిస్తందన్నమాట.

బ్యాంకు అకౌంట్ పోర్టబులిటీని అందుబాటులోకి తీసుకొచ్చేందుకు భారత రిజర్వ్ బ్యాంకు (ఆర్బీఐ) కసరత్తు ప్రారంభించింది. ఈ మేరకు ఆర్బీఐ డిప్యూటీ గవర్నర్ ఎస్ఎస్ ముంద్రా బ్యాంకు అకౌంట్ పోర్టబుటిలీకి సంబంధించిన చర్యలు వేగవంతం చేయాలని అన్ని బ్యాంకులకు సమాచారమిచ్చారు.

ఖాతాదారులు తమ బ్యాంకు అకౌంట్ ను మార్చుకోకుండా మరో బ్యాంకుకు ఖాతాదారుడిగా మారే అవకాశం త్వరలోనే కలగనుందని ఆయన ‘బ్యాంకింగ్ కోడ్స్ అండ్ స్టాండర్డ్ బోర్డ్ ఆఫ్ ఇండియా’ సమావేశంలో వెల్లడించారు.

ఇప్పటికే ఒక బ్యాంకు ఖాతా నంబరు శాఖ (బ్రాంచ్)ను మార్చుకునే అవకాశం ఉంది. అయితే బ్యాంకులు మారే (ఒక బ్యాంకు నుంచి మరో బ్యాంకుకు తన అకౌంటును బదిలీ చేసుకునే అకాశం) పోర్టబులిటీ త్వరలోనే అందుబాటులోకి రానుంది. దీంతో ఫలానా బ్యాంకు తనకు సరిగ్గా సేవలు అందించడం లేదని భావించే ఖాతాదారులు పోర్టబులిటీతో నచ్చిన బ్యాంకుకు తన అకౌంటును మార్చుకోవచ్చు.