నేపాల్‌కు భారీగా భారత్ వందనోట్లు

నేపాల్‌కు రూ.100కోట్ల విలువైన రూ.100ల నోట్లను పంపిణీ చేసేందుకు భారతీయ రిజర్వ్‌ బ్యాంకు (ఆర్బీఐ) నిర్ణయించింది. భారత్‌లో పెద్ద నోట్లరద్దు ప్రభావంతో ఇబ్బందులుపడుతున్న నేపాల్‌ ప్రజలకు ఉపశమనం కలిగించేందుకు ఈ నిర్ణయం తీసుకొంది. పొరుగు దేశమైన నేపాల్‌లో భారత కరెన్సీ భారీగానే చలామణీలో ఉంది. ముఖ్యంగా సరిహద్దు పరిసర ప్రాంతాల ప్రజలకు ఇండియన్‌ కరెన్సీ అవసరం అధికంగా ఉంటుంది. వివిధ అవసరాల నిమిత్తం నిత్యం వేలాదిమంది నేపాలీలు భారత్‌కు రాకపోకలు సాగిస్తుంటారు. నవంబర్ 8 తర్వాత నోట్లమార్పిడికి తీవ్ర ఇబ్బందులు నెలకొన్నాయి.

కొంతకాలంగా తమ దేశంలోని కరెన్సీని చలామణీ చేసుకునేలా అవకాశం కల్పించాలని నేపాల్‌ రాష్ట్ర బ్యాంకు కోరుతోంది. దీనిపై స్పందించిన ఆర్బీఐ ఈ నిర్ణయం తీసుకుంది. ఈ నెలాఖరులోగా నేపాల్‌కు రూ.వంద కోట్ల విలువైన రూ.100 నోట్లను ఆర్‌బీఐ పంపించేందుకు ఏర్పాటు చేస్తోంది.