ఎర్ర ధోతి ధరించాడని యువకుడిపై దాడి!

ఎర్ర రంగు ధోతి ధరించినందుకు ఓ యువకుడిపై ఆర్ఎస్ఎస్ కార్యకర్తలు దాడికి పాల్పడిన ఘటన కేరళలోని కాసర్‌గడ్‌లో చోటుచేసుకుంది. ఆర్ఎస్ఎస్‌కి బాగా పట్టున్న కాసర్‌గడ్‌లో కేరళ సంప్రదాయ నృత్యమైన తెయ్యం ప్రదర్శన చూసేందుకని బుధవారం 25 ఏళ్ల జెఫ్రిన్ జెరాల్డ్ (అసిస్టెంట్ డైరెక్టర్) అనే యువకుడు తన మిత్ర బృందంతో కలిసి తిరువనంతపురం నుంచి కాసర్‌గడ్ వెళ్లాడు. ఆ సమయంలో జెఫ్రిన్ ఎర్ర రంగు ధోతి ధరించడం చూసిన ఆర్ఎస్ఎస్ కార్యకర్తలు అతడిని ఓ కమ్యూనిస్ట్ కార్యకర్తగా పొరపడుతూ డాడికి పాల్పడినట్టు తెలుస్తోంది.

"మా ఏరియాలోకి వచ్చి ఎర్ర రంగు గల ధోతి ధరించడానికి నీకు ఎంత ధైర్యం అంటూ జెఫ్రిన్‌ని పక్కకు తీసుకెళ్లి దాడికి పాల్పడ్డారు. జెఫ్రిన్‌ని కొట్టవద్దని ఎంత వేడుకున్నా వాళ్లు మా మాట వినలేదు'' అని తెలిపారు అతడి స్నేహితులు. మాతో పాటు తెయ్యం చూడటానికని వచ్చిన మా స్నేహితురాలిని కనీసం యువతి అని కూడా చూడకుండా ఆమెపై కూడా దాడి చేశారని జెఫ్రిన్ స్నేహితులు వాపోయారు. అంతేకాకుండా పోలీసులకి కానీ లేదా మీడియాకు కానీ ఫిర్యాదు చేస్తే పరిస్థితి మరోలా ఉంటుందని తమని బెదిరించారు అని తెలిపారు జెఫ్రిన్ స్నేహితులలో ఒకరు.

ఈ దాడిలో తీవ్రంగా గాయపడిన జెఫ్రిన్ కన్నూరులోని ఏకేజీ ఆస్పత్రి ఐసీయులో చికిత్స పొందుతున్నాడు. తమ కార్యకర్తల దాడిలో గాయపడి ఆస్పత్రిపాలైన జెఫ్రిన్ బృందాన్నిపరామర్శించిన ఆర్ఎస్ఎస్ నేతలు... ఏదీ మనసులో పెట్టుకోకుండా ఈ విషయాన్ని ఇంతటితో మర్చిపోవాలని సూచించారని సమాచారం.

CLICK HERE TO READ THIS ARTICLE IN MALAYALAM ALSO :
http://malayalam.samayam.com/news/state/youth-attacked-by-rss-gundas-for-wearing-red-dhoti/articleshow/56347095.cms