కారుణ్య మరణంపై సుప్రీం సంచలన తీర్పు!

కారుణ్య మరణంపై సుప్రీంకోర్టు శుక్రవారం సంచలనాత్మక తీర్పు ఇచ్చింది. ప్రాణాంతక వ్యాధులతో బాధపడుతున్న వారికి గౌరవంగా ప్రాణం తీసివేసే కారుణ్య మరణాన్ని (పాసివ్ యుతనేసియా)కు సుప్రీం అనుమతించింది. పరోక్ష కారుణ్య మరణాలు, వాటి కోసం పరిగణించే సజీవ వీలునామా(లివింగ్ విల్లు) అనుమతించదగినవే అని తెలిపింది. ఈ మేరకు కొన్ని కఠిన మార్గదర్శకాలను జారీ చేసింది. దీనిపై చట్టాన్ని తీసుకొచ్చేంత వరకు ఈ మార్గదర్శకాలు అమల్లో ఉంటాయని తెలిపింది.

గౌరవంతో మరణించే హక్కు మానవులకు ఉందని, మార్గదర్శకాలతో కారుణ్య మరణాలను అనుమతించవచ్చని ప్రధాన న్యాయమూర్తి జస్టిస్ దీపక్ మిశ్రా నేతృత్వంలో ఐదుగురు న్యాయమూర్తులతో కూడిన రాజ్యాంగ ధర్మాసనం వెల్లడించింది.

రోగి పరిస్థితి అత్యంత విషమంగా ఉండి, వ్యాధి పూర్తిగా నయం కాదని చట్టబద్ధమైన మెడికల్ బోర్డు ప్రకటించిన తర్వాతే ప్రాణ ఆధారం (లైఫ్ సపోర్ట్) తొలగించాలని సుప్రీం సూచించింది. రోగులు తమకు ఇవ్వాల్సిన చికిత్సపై ముందుగానే సూచనలు జారీచేసే పత్రాన్ని సజీవ వీలునామా అంటారు. సజీవ వీలునామాకు రోగుల కుటుంబ సభ్యుల నుంచి కూడా అనుమతి ఉండాలని తెలిపింది.

సజీవ వీలునామాతో రోగి కుటుంబ సభ్యులు హైకోర్టును ఆశ్రయిస్తే.. కారుణ్య మరణం అవసరమా, లేదా అని నిర్ణయించేందుకు ఆ న్యాయస్థానం మెడికల్ బోర్డును ఏర్పాటు చేయాలని సుప్రీం స్పష్టం చేసింది. ఈ సందర్భంగా జస్టిస్ దీపక్ మిశ్రా తీర్పును వెలువరిస్తూ.. అలాంటి రోగులకు గౌరవంగా చనిపోయే హక్కు ఉంటుందని తెలిపారు.
Read this story in English
ప్రాణాంతక వ్యాధులతో జీవచ్ఛవాలుగా బతుకుతున్న రోగులకు కారుణ్య మరణాలను ప్రసాదించాలనే చర్చ ఎప్పటి నుంచో సాగుతున్న సంగతి తెలిసిందే. ఈ సందర్భంగా న్యాయస్థానాల్లో పలువురు పిటీషన్లు కూడా దాఖలు చేశారు. వీటిపై 2017, అక్టోబరు 11న వాదనలు ముగిశాయి. ఈ నేపథ్యంలో శుక్రవారం దీనిపై ధర్మాసనం తాజా తీర్పును వెల్లడించింది.