నోట్లరద్దు: రూ.80,000 కోట్ల రుణాల చెల్లింపు

మోడీ సర్కారు తీసుకున్న సంచలన నిర్ణయం పెద్ద నోట్ల రద్దు. నోట్ల రద్దు అనంతరం బ్యాంకు ఖాతాల్లో జమ అయిన మొత్తాలపై ఆదాయపు పన్ను శాఖ దృష్టి సారించింది. బ్యాంకుల నుంచి ఏఏ అకౌంట్లలో భారీ మొత్తాలు పడ్డాయో అన్ని వివరాలు తెప్పించుకుంది. నోట్ల రద్దు అనంతరం ఎగవేత దారులు దాదాపు 80వేల కోట్ల రూపాయల రుణాలను తిరిగి చెల్లించినట్టు ఆదాయపు పన్ను శాఖ అధికారులు మంగళవారం తెలిపారు. అలాగే నోట్ల రద్దు అనంతరం దేశంలో ఉన్న 60 లక్షల బ్యాంకు ఖాతాల్లో రెండు లక్షల కన్నా ఎక్కువ నగదు జమ అయినట్టు గుర్తించామని పేర్కొన్నారు. వీటిపై త్వరలో విచారణ ఉంటుందని వారు చెప్పారు.

సహకార బ్యాంకు ఖాతాల్లో రూ.16,000 కోట్లు నోట్ల రద్దు అనంతరం డిపాజిట్ అయినట్టు తెలిపారు. పాతిక వేల కోట్ల రూపాయల దాకా చాలా నెలలుగా వాడకుండా వదిలేసిన బ్యాంకు ఖాతాల్లో డిపాజిట్ అయినట్టు గుర్తించినట్టు అధికారులు చెప్పారు. ఈశాన్య రాష్ట్రాల్లో బ్యాంకు ఖాతల్లో రూ.10,700 కోట్లు జమ అయ్యాయని వారు తెలిపారు.

నవంబర్ 8, 2016 న మోడీ రూ.500, రూ.1000 నోట్లను రద్దు చేస్తున్నట్టు ప్రకటించారు. అప్పట్నించి పాత నోట్లను డిసెంబర్ 31, 2016 లోపు బ్యాంకుల్లో మార్పిడి చేసుకోవాలని తెలిపారు. ఈ డిసెంబర్ 31తో ఆ గడువు ముగిసింది. మోడీ తీసుకున్న ఈ నిర్ణయం వల్ల కట్టకట్టలుగా డబ్బును ఇళ్లల్లో దాచుకున్న అనేకమంది నల్లధన కుబేరుల బండారం బయటపడింది.