Sabarimala: కేరళ హైకోర్టు ఆదేశాలతో శబరిమల ఆలయ ప్రసాదం నిలిపివేత.. ఎందుకంటే !

Sabarimala:శబరిమల అరవణ ప్రసాదం విక్రయాలు నిలిచిపోయాయి. ప్రసాదం తయారీలో వినియోగించే యాలకుల్లో మోతాదుకు మించి రసాయనాలు ఉన్నట్లు ఆహార భద్రతా, ప్రమాణ ప్రాధికార సంస్థ (FSSAI) నివేదిక ఇచ్చింది. దీంతో ఈ ప్రసాదం విక్రయాలను నిలిపివేయాలని కేరళ హైకోర్టు ట్రావెన్‌కోర్‌ దేవస్వమ్‌ బోర్డు (Travancore Devaswom Board)ను ఆదేశించింది. కోర్టు తీర్పు మేరకు బుధవారం అరవణ ప్రసాదం విక్రయాలు నిలిపివేశారు. అరవణ పాయసం తయారీలో ఆహార భద్రత ప్రమాణాలు పాటించడం లేదని కోర్టు పేర్కొంది. ప్రసాదం రుచికి ఉపయోగించే యాలకుల్లో మెతాదుకు మించి పురుగు మందు అవశేషాలు ఉన్నట్లు తేలింది. ఈ నేపథ్యంలోనే ప్రసాదం పంపిణీ నిలిపివేయాలని న్యాయస్థానం ఆదేశించింది. శబరిమల ప్రసాదంలో వినియోగించే యాలకులను ట్రావెన్‌కోర్ బోర్డు గతంలో అయ్యప్ప స్పైసెస్‌ అనే కంపెనీ నుంచి కొనుగోలు చేసింది. అయితే 2022-23 సీజన్‌లో ఈ యాలకుల కాంట్రాక్టును కొల్లాంకు చెందిన ఓ సప్లయర్‌కు బోర్డు అక్రమంగా అప్పగించిందని అయ్యప్ప స్పైసెస్‌ కంపెనీ ఆరోపించింది. యాలకుల నాణ్యతపై అయ్యప్ప స్పైసెస్‌ కంపెనీ ఫిర్యాదు చేయడంతో ఫుడ్‌ సేఫ్టీ అండ్‌ స్టాండర్డ్ అథారిటీ ఆఫ్‌ ఇండియా (FSSAI) లాబొరేటరీలో పరీక్షలు నిర్వహించారు. పరీక్షల్లో పరిమితికి మంచి రసాయనాలు ఉన్నట్లు ఎఫ్‌ఎస్‌ఎస్‌ఏఐ నివేదిక ఇచ్చింది.

నివేదిక ఆధారంగా విచారణ చేపట్టిన న్యాయస్థానం.. ప్రసాదం విక్రయాలపై మధ్యంతర ఆదేశాలు జారీ చేసింది. ఈ మేరకు ప్రసాదం విక్రయాలు నిలిపివేయాలని ట్రావెన్‌కోర్‌ దేవస్వమ్‌ బోర్డును కోర్టు ఆదేశించింది. అయితే, యాలకులు లేకుండా చేసిన ప్రసాదం లేదా ఎఫ్‌ఎస్‌ఎస్‌ఏఐ ప్రమాణాలకు అనుగుణంగా కొనుగోలు చేసిన యాలకులతో తయారుచేసిన ప్రసాదాన్ని విక్రయించుకోవచ్చని కోర్టు.. ట్రావెన్‌కోర్‌ దేవస్వమ్‌ బోర్డుకు సూచించింది. అనంతరం దీనిపై తదుపరి విచారణను జనవరి 13వ తేదీకి వాయిదా వేసింది.

• Read More Telangana News And Telugu News