అమ్మ బహిష్కరించిన వ్యక్తికి అందలం

అక్రమాస్తుల కేసులో తనను సుప్రీంకోర్టు దోషిగా నిలబెట్టినా...శత్రువర్గం సీఎం కాకుండా అడ్డుకున్నా... చిన్నమ్మ శశికళ అన్నాడీఎంకేపై పట్టు విడకుండా ఉన్నారు. తాను జైలుకు వెళ్లినా..పార్టీ అంతా తన గుప్పిట ఉండాలని ఎత్తుకు పైఎత్తులు వేశారు.

జయలలిత బతికున్నప్పుడు పార్టీ నుంచి బహిష్కరణకు గురైన టీవీవీ దినాకరన్ ను శశికళ ఏకంగా అన్నాడీఎంకేకు డిప్యూటీ కార్యదర్శిగా నియమించారు. ఈయన శశికళకు సమీప బంధువు (అక్క కొడుకు). ఈయన గతంలో రాజ్యసభ ఎంపీగా పనిచేశారు.

వాస్తవానికి జయలలిత మరణించిన గతేడాది డిసెంబర్ 5 నుంచే శశికళ పార్టీపై పట్టు బిగించడం ప్రారంభించారు. అమ్మ బతికున్నప్పుడు తరిమేసినా శశికళ బంధుగణమంతా తిరిగి పోయెస్ గార్డెన్ చేరుకున్నారు. ఇందులో టీవీవీ దినాకరన్ ఒకరు.

పార్టీ క్రమశిక్షణరాహిత్యానికి పాల్పడ్డందుకు గానూ అమ్మ దినాకరణ్ ను సస్పెండ్ చేస్తే..చిన్నమ్మ మాత్రం ‘ఆయన రాతపూర్వకంగా క్షమాపణ చెప్పారు’ అని చెబుతూ పార్టీ ఉన్నత పదవి కట్టబెట్టారు.

1996 జయ దత్తపుత్రుడు సుధాకరన్ కనీవినీ ఎరుగని రీతిలో పెళ్లి చేశాక..ఆయన కజిన్లు టీవీవీ దినాకరన్, భాస్కరన్ లు కూడా అప్పుడే తెరపైకి వచ్చారు. శశికళ అండతో వీరు పలు దందాలు చేసినట్లు ఆరోపణలున్నాయి. ఇందులో కొన్ని సుప్రీంకోర్టులో రుజువయ్యాయి.