తమిళనాట మరో సంచలనం.. శశికళ, దినకరన్‌కు షాక్!

తమిళనాడు రాజకీయాలు శరవేగంగా మారుతున్నాయి. అధికారిక అన్నాడీఎంకే పార్టీ నుంచి చిన్నమ్మ శశికళ, ఆమె మేనల్లుడు దినకరన్‌ను బహిష్కరించారు. సీఎం పళనిస్వామి, డిప్యూటీ సీఎం పన్నీర్ సెల్వం ఆధ్వర్యంలో సోమవారం (ఆగస్టు 28) నిర్వహించిన పార్టీ సమావేశంలో వీరిని బహిష్కరిస్తూ అధికారికంగా నిర్ణయం తీసుకున్నారు. అంతేకాకుండా శశికళ చేపట్టిన నియామకాలన్నీ చెల్లుబాటు కావని పార్టీ స్పష్టం చేసింది. దీంతో పాటు అన్నాడీఎంకేకు చెందిన జయ టీవీ, నమదు ఎంజీఆర్‌ పత్రికను పార్టీ నియంత్రణలోకి తీసుకొచ్చేందుకు చర్యలు తీసుకుంటామని నేతలు తెలిపారు. ప్రస్తుతం నమదు ఎంజీఆర్‌ పత్రిక జయ పబ్లికేషన్‌ ఆధ్వర్యంలో నడుస్తోంది. దీనికి శశికళ యజమానిగా ఉన్నారు.

శశికళ, దినకరన్‌ను పార్టీ నుంచి బహిష్కరించాలని.. అప్పుడే విలీనం సాధ్యమవుతుందని పన్నీర్‌ వర్గం డిమాండ్‌ చేసిన విషయం తెలిసిందే. ‘శశికళ, దినకరన్‌ను పార్టీ నుంచి తొలగించాం. ఇకపై పార్టీ తరఫున దినకరన్‌ ఎలాంటి నిర్ణయం తీసుకున్నా అది చెల్లదు. పార్టీ నియమాల ప్రకారం.. దినకరన్‌ నియామకం జరగలేదు. అంతేకాకుండా, ఆయన నియామకాన్ని ఎన్నికల సంఘం కూడా ధ్రువీకరించలేదు’ అని అన్నాడీఎంకే ఎంపీ ముతుకరప్పన్‌ తెలిపారు.

అన్నాడీఎంకే అధినేత్రి జయలలిత మరణం తర్వాత ఆమె నెచ్చెలి శశికళ పార్టీ పగ్గాలు చేపట్టారు. పార్టీ ప్రధాన కార్యదర్శి పదవి చేపట్టిన శశికళ.. ఆమె మేనల్లుడు దినకరన్‌కు ఉప ప్రధాన కార్యదర్శి బాధ్యతలు అప్పగించారు. అనంతర పరిణామాల నేపథ్యంలో పార్టీ రెండుగా చీలిపోయింది. అనేక నాటకీయ పరిణామాల తర్వాత ఇటీవలే ఓపీఎస్, ఈపీఎస్ వర్గాలు ఒక్కటయ్యాయి.