ఇంకొద్దిసేపట్లో తేలనున్న చిన్నమ్మ భవితవ్యం

ఏఐఏడీఎంకే ప్రధాన కార్యదర్శి పదవిలో వుండి, తమిళనాడు సీఎం పదవి కోసం తీవ్ర ప్రయత్నాలు చేస్తున్న శశికళ భవితవ్యం ఏంటనేది ఇంకొద్దిసేపట్లో తేలిపోనుంది. అక్రమాస్తుల కేసులో తమిళనాడు దివంగత ముఖ్యమంత్రి జయలలితతోపాటు సహా నిందితురాలిగా విచారణ ఎదుర్కుంటున్న శశికళ రాజకీయ భవితవ్యం ఇవాళ ఆ కేసులో సుప్రీం కోర్టు ఇవ్వబోయే తీర్పుపై ఆధారపడి వుండనుంది. షెడ్యూల్ ప్రకారం మంగళవారం ఉదయం 10:30 గంటలకి సుప్రీం కోర్టు ఈ కేసులో తీర్పు వెలువరించనుంది.

జస్టిస్ పీసీ ఘోష్, జస్టిస్ అమితవ రాయ్ లు న్యాయమూర్తులుగా వున్న ధర్మాసనం వెల్లడించనున్న ఈ తీర్పు శశికళకు ఏ మాత్రం వ్యతిరేకంగా వచ్చినా అది సీఎం కావాలనే ఆమె ఆశలపై నీళ్లుజల్లినట్టే. ఒకవేళ అలాకాకుండా ఈ కేసులో ఆమె నిర్ధోషిగా బయటపడితే, శశికళను సీఎం అభ్యర్థిత్వానికి మద్దతిస్తున్న వారి సంఖ్య పెరిగే అవకాశం వుంది.

అదేకానీ జరిగితే ముఖ్యమంత్రిగా తన స్థానాన్ని పదిలం చేసుకోవాలనుకుంటున్న పన్నీర్ సెల్వంకి ఇది ఇబ్బందికరమైన పరిణామం కానుంది. దీంతో గత కొన్ని రోజులుగా పూటకో మలుపు తిరుగుతూ, యావత్ దేశం దృష్టిని ఆకర్షించిన తమిళనాడు రాజకీయాలపై ఈ తీర్పు ప్రభావం చాలానే వుండనుంది అని విశ్లేషకులు అభిప్రాయపడుతున్నారు.