శశికళకు షాక్: పక్కా ఆధారాలు సమర్పించిన రూప

బెంగళూరు పరప్పన అగ్రహారం జైల్లో శిక్ష అనుభవిస్తున్న దివంగత నేత జయలలిత స్నేహితురాలు, అన్నాడీఎంకే ప్రధాన కార్యదర్శి శశికళకు ఊహించని షాక్ తగిలింది. జైలు అధికారులకు రూ.2 కోట్ల ముడుపులు చెల్లించి వీవీఐపీ మర్యాదలు పొందుతున్నారని డీఐజీ రూప సీబీఐకి స్పష్టమైన ఆధారాలు సమర్పించారు. వీటిలో జైలులోని ప్రధాన ద్వారం నుంచి శశికళ బయటకు వస్తున్న విజువల్స్ ఉండడం విశేషం. దీంతో పాటు జైలులో శశికళ విలాసాలపై 14 పేజీల నివేదికను కూడా ఆమె అందజేశారు. సాధారణంగా లోపలికి ఖైదీలు వెళ్లినా, జైలు నుంచి బయటకు వచ్చినా ప్రధాన ద్వారానికి ఉండే చిన్న ప్రవేశ మార్గం గుండానే రాకపోకలు సాగుతాయి. సాధారణ జైలు సిబ్బంది కూడా ఇదే ద్వారం నుంచి లోనికి వెళ్లి బయటకు వస్తుంటారు. ఉన్నత స్థాయి అధికారులకు మాత్రమే ప్రధాన ద్వారం తెరిచే వెసులుబాటు ఉంటుంది.

ఈ నేపథ్యంలో శశికళకు సంబంధించిన పుటేజ్ ఈ వివాదంపై స్పష్టతనిస్తోంది. డీఐజీ రూప తాజాగా సమర్పించిన ఆధారాలు, నివేదికతో శశికళకు జైలులో వీవీఐపీ మర్యాదలు అందుతున్నాయని స్పష్టమవుతోంది. జయలలిత అక్రమాస్తుల కేసులో శశికళను దోషిగా నిర్ధరించిన సుప్రీంకోర్టు ఆమెకు నాలుగేళ్ల శిక్ష ఖరారు చేసింది. దీంతో గత ఫిబ్రవరి నుంచి శశికళ బెంగళూరులోని పరప్పన అగ్రహారం కేంద్ర కారాగారంలో శిక్ష అనుభవిస్తున్నారు. ఆమెను సాధారణ ఖైదీగానే పరిగణించాలని సర్వోన్నత న్యాయస్థానం తీర్పులో పేర్కొన్నా సిబ్బంది మాత్రం ప్రత్యేక వసతులు కల్పించినట్లు జైళ్ల శాఖ డీఐజీ రూప ఈ విషయం బయటపెట్టిన విషయం తెలిసిందే.

దీని కోసం సిబ్బందికి భారీగా ముడుపులు సమర్పించారని, కర్ణాటకకు చెందిన ఓ మంత్రి కూడా సహకారం అందించినట్లు ఆరోపణలు వెల్లువెత్తాయి. అయితే డీఐజీ రూప నిబంధనలను ఉల్లంఘించి మీడియా ముందు నివేదికను బయటపెట్టారనే సాకుతో ఆమెను ట్రాఫిక్ విభాగానికి కర్ణాటక ప్రభుత్వం బదిలీ చేసింది. ముడుపుల వ్యవహారంలో జైళ్ల శాఖ డీజీపీకి కూడా సంబంధం ఉందని రూప తన నివేదికలో పేర్కోవడం గమనార్హం. శశికళ ఉండేది జైళ్లో కాదని, సమీపంలోని ఓ ఆపార్ట్‌మెంట్‌లో ఉంటున్నారని, దీనికి ఎస్ఐ స్థాయి అధికారి సహకరిస్తున్నారని రూప ఆరోపించారు.