కరోనాతో తల్లి మృతి ... మృతదేహాన్ని ఆస్పత్రిలోనే వదిలేసిన కొడుకు

కరోనా వైరస్ ప్రాణాల్నే కాదు.. మానవ సంబంధాల్ని, అనుబంధాల్ని సైతం దెబ్బతిస్తోంది. అందుకే పంజాబ్‌ల చోటు చేసుకున్న ఈ ఘటనే నిదర్శనం. నవమాసాలు కనిపెంచిన ఓ తల్లి దురదృష్ట వశాత్తు కరోనాతో మరణించింది. అయితే ఆమె మృతదేహాన్ని తీసుకెళ్లేందుకు బంధువులు ఎవరూ ముందుకు రాలేదు. ఆఖరికి కన్న కొడుకు కూడా తల్లి డెడ్ బాడీనికి తీసుకెళ్లడానికి నిరాకరించాడు. ఈ దారుణ ఘటన పంజాబ్ రాష్ట్రంలోని లుధియానాలో చోటు చేసుకుంది.

షిమ్లాపురి గ్రామానికి చెందిన 69 ఏళ్ల వృద్ధురాలిని కరోనా లక్షణాలతో మార్చి 31న ఓ ప్రైవేట్ హాస్పిటల్ లో చేర్పించారు. గత ఆదివారం ఆమె కరోనా రక్కసి కారణంగా ప్రాణాలు కోల్పోయింది. దీంతో ఆమె మృతదేహాన్ని తీసుకెళ్లాలని జిల్లా అధికారులు ఆమె కుమారుడిని కోరారు. అయితే ఆమె శవాన్ని తీసుకెళ్లేందుకు కుమారుడు కానీ, బంధువులు కానీ ఎవరూ రాలేదు. దీంతో అధికారులు షాక్ కు గురయ్యారు.

ఈ ఘటనపై అక్కడి అడిషనల్ డిప్యూటీ కమిషనర్ ఇక్బాల్ సింగ్ స్పందించారు. డెడ్ బాడీ నుంచి ఇన్ఫెక్షన్ సోకకుండా అవసరమైన ప్రొటెక్టివ్ గేర్స్ కూడా ఇస్తామని చెప్పిన డెడ్ బాడీని ఎవరు తీసుకువెళ్లలేదన్నారు. ఆమె కుమారుడు కానీ, బంధువులు కానీ రాలేదని చెప్పారు. ఆమె కుటుంబ సభ్యులను అధికారులు రెండు సార్లు సంప్రదించారని... ఎవరూ కూడా ముందుకు రాలేదని తెలిపారు. ఈ ఘటన తమను షాక్ కు గురి చేసిందని ఆయన ఆవేదన వ్యక్తం చేశారు. చివరకు చేసేదేమీ లేక... సోమవారం అర్ధరాత్రి జిల్లా అధికారులే అంత్యక్రియలను నిర్వహించారని చెప్పారు. మృతురాలి కుమారుడు, బంధువులు అంత్యక్రియలను 100 మీటర్ల దూరం నుంచి వీక్షించారని తెలిపారు.