వీడియో: ఆలస్యానికి శిక్ష.. విద్యార్థి మృతి!

పాఠశాలకు ఆలస్యంగా వచ్చినందుకు టీచర్లు వేసిన శిక్ష ఓ విద్యార్థి మరణానికి కారణమైంది. చెన్నైకి చెందిన ఓ కార్పొరేట్ స్కూల్‌లో ఈ విషాదం చోటు చేసుకుంది. విద్యార్థి కుటుంబసభ్యులు, బంధువుల ఆందోళనలతో చెన్నై నగరంలో తీవ్ర ఉద్రిక్తత నెలకొంది. నగరంలోని ఓ కార్పొరేట్ పాఠశాలకు చెందిన ఓ విద్యార్థి బుధవారం (జనవరి 17) ఉదయం ప్రార్థనా సమయంలో ఒక్కసారిగా కుప్పకూలిపోయాడు. అతణ్ని వెంటనే సమీపంలోని ఆసుపత్రికి తరలించారు. చికిత్స పొందుతూ ఆ బాలుడు గురువారం మృతి చెందాడు.

బాలుడి ఆకస్మిక మరణం పట్ల అనుమానం వ్యక్తం చేసిన అతడి తల్లిదండ్రులు పోలీసులను ఆశ్రయించారు. సీసీటీవీ ఫుటేజీలను పరిశీలించగా.. పాఠశాలకు లేట్‌గా వచ్చిన విద్యార్థులకు ‘డక్ వాక్’ శిక్ష విధించిన దృశ్యాలు వెలుగులోకి వచ్చాయి. తమ కుమారుణ్ని మోకాళ్లపై నడిపించడం వల్లే మరణించాడని బాలుడి తల్లిదండ్రులు ఆరోపిస్తున్నారు.