మొబైల్ పోయిందన్న బాధతో విద్యార్థిని ఆత్మహత్య

రానురాను యువత సెన్సిటీవ్ (సున్నిత మనస్కులు)గా మారుతున్నారు. టీవీ రిమోట్ ఇవ్వలేదని ఒకరు, ఇంట్లో తిట్టారని కొందరు, పరీక్ష తప్పారంటూ కొందరు.. ఇలా పలు కారణాలతో బలవన్మరణాలు చెందుతున్నారు. కర్ణాటకలోని మైసూరులో ఇలాంటి ఘటనే చోటుచేసుకుంది. సెల్‌ఫోన్‌ పోగొట్టుకున్నానని మనస్తాపం చెందిన విద్యార్థిని ఆత్మహత్యకు పాల్పడింది.

స్థానిక నగరంలోని గాంధీనగర్‌కు చెందిన నిఖిత (16) గాయత్రిపురంలో ఉన్న ఓ ప్రైవేటు పాఠశాలలో టెన్త్ క్లాస్ చదువుతోంది. ఈ క్రమంలో బుధవారం సాయంత్రం సోదరుడికి ఫోన్ చేసి మాట్లాడింది. ఆ తర్వాత నిఖితకు తన సెల్‌ఫోన్‌ కనిపించలేదు. తండ్రి తనకు ఎంతో ప్రేమగా కొనిచ్చిన మొబైల్ కనిపించలేదని మనస్తాపానికి లోనైన విద్యార్థిని గురువారం ఇంట్లో ఎవరు లేని సమయంలో ఉరేసుకొని ఆత్మహత్య చేసుకుంది. పోలీసులు కేసు నమోదు చేసుకుని విచారణ చేపట్టారు.