రూ.500 లంచానికి రెండేళ్ల జైలు పాలు

కేరళలో ఓ సీనియర్ పోలీసు అధికారికి తగిన శాస్తి జరిగింది. ప్రతీ కేసులో చేతివాటం ప్రదర్శించే ఆ అధికారి ఇప్పుడు జైల్లో ఊచలు లెక్కపెడుతున్నాడు. 2010లో ఓ చిన్న రోడ్డు ప్రమాదం కేసులో మోటార్ బైక్‌ను వదిలి పెట్టేందుకు రూ.500 తీసుకున్నందుకు జైలు పాలయ్యాడు. కొచ్చిలోని విజిలెన్స్ కోర్టు రూ.25 వేల జరిమానతో పాటు రెండేళ్ల కఠిన కారాగార శిక్ష విధించింది. జరిమాన కట్టకపోతే జైలు శిక్షను మరో నెల పొడిగించాలని తీర్పులో న్యాయమూర్తి పేర్కొన్నారు. శిక్ష ఖరారు చేస్తూ న్యాయమూర్తి ఏమాత్రం జాలి, దయలకు తావు ఇవ్వలేదు. అవినీతిని అరికట్టేందుకు ఈ మాత్రం కాఠిన్యాన్ని పాటించాల్సిందే అని తీర్పు వెలువరిస్తూ అభిప్రాయపడ్డారు.

2010లో కొచ్చి పరిసరాల్లో జరిగిన ఓ రోడ్డు ప్రమాదంలో సురేష్ అనే వ్యక్తిని సీనియర్ పోలీసు అధికారి వెయ్యి రూపాయలు డిమాండ్ చేయగా సురేష్ ఐదు వందలు ఇచ్చేందుకు అంగీకరించాడు. ఆ తర్వాత విజిలెన్స్ అధికారులను సంప్రదించి డబ్బులగిన అధికారిని రెడ్ హ్యాండెడ్ గా పట్టించాడు. 8 ఏళ్ల తర్వాత ఈ కేసులో తీర్పు వెలువడింది.