కర్ణాటక ఎన్నికల బరిలో సినీ నటి సుమలత?

కర్ణాటక అసెంబ్లీ ఎన్నికల బరిలో సినీ నటి సుమలత దిగబోతున్నారంటూ జోరుగా ప్రచారం జరుగుతోంది. భర్త అంబరీష్ స్థానంలో ఆమె పోటీ చేయబోతున్నట్లు టాక్ వినిపిస్తోంది. మండ్య నియోజకవర్గం నుంచి అంబరీష్‌ను పోటీ చేయించేందుకు కాంగ్రెస్ అధిష్టానం సిద్ధమయ్యింది. అయితే ఆయనకు ఆరోగ్యం సహకరించడం లేదట. అందుకే ఆయన స్థానంలో సుమలతను నిలబెడితే మంచిదని అభిప్రాయంలో పార్టీ పెద్దలు ఉన్నారట. ఈ నిర్ణయంతో అంబరీష్ కూడా సంతృప్తితో ఉంటారని భావిస్తున్న అధిష్టానం... దీనికి సూత్రప్రాయంగా అంగీకరించినట్లు సమాచారం. అలాగే అంబరీష్ కూడా రాహుల్ గాంధీని కలిసి... తనకు బదులు సుమలతకు టిక్కెట్ ఇవ్వమని కోరినట్లు ఊహాగానాలు వినిపిస్తున్నాయి.

సుమలతను పోటీ చేయించడంపై సిద్ధరామయ్య అంత ఆసక్తిగా లేరని వార్తలు వినిపిస్తున్నాయి. అంబరీష్‌కే టిక్కెట్ కేటాయిస్తే మంచిదనే భావనలో ఆయన ఉన్నారట. లేని పక్షంలో ఈ ప్రభావం మైసూర్ జిల్లాపై పడుతుందనే ఆందోళన వ్యక్తం చేస్తున్నట్లు తెలుస్తోంది. మరి ఈ వ్యవహారంలో అధిష్టానం ఎలాంటి నిర్ణయం తీసుకుంటుందన్నది ఆసక్తిగా మారింది.