మరో సీనియర్ జర్నలిస్టు దారుణ హత్య?

జర్నలిస్టు గౌరీ లంకేశ్ హత్యోదంతం మరవకముందే పంజాబ్‌లో మరో సీనియర్‌ జర్నలిస్టు హత్యకు గురయ్యారు. మొహాలీ ప్రాంతంలో జర్నలిస్టు కేజీ సింగ్‌ (62), ఆయన తల్లి గురుచరణ్‌ కౌర్‌ (92) అనుమానాస్పద స్థితిలో మృతి చెందారు. గురుచరణ్ కౌర్ నివాసంలో వీరిద్దరూ విగతజీవులై కనిపించారు. శనివారం (సెప్టెంబర్ 23) మధ్యాహ్నం ఓ వ్యక్తి సింగ్‌ను కలవడానికి ఆయన ఇంటికి వెళ్లాడు. అయితే ఎంతకీ వారు తలుపు తీయకపోవడంతో అనుమానం వచ్చి అతడు పోలీసులకు సమాచారమిచ్చాడు. పోలీసులు వచ్చి లోపలికెళ్లి చూడగా.. సింగ్‌ రక్తపుమడుగులో పడి ఉన్నారు. పక్కనే ఆయన తల్లి మృతదేహం కూడా ఉంది.

సింగ్‌‌ను గొంతు కోసి, ఆయన తల్లిని గొంతు నులుమి చంపి ఉంటారని పోలీసులు భావిస్తున్నారు. సింగ్‌ కారు కూడా కనిపించకుండా పోయినట్లు పోలీసులు తెలిపారు. సింగ్‌ ఇండియన్‌ ఎక్స్‌ప్రెస్‌, ది ట్రిబ్యూన్‌ లాంటి పత్రికల్లో ఎడిటర్‌గా పనిచేశారు.