శుభవార్త: కోవిషీల్డ్ వ్యాక్సిన్ ధర భారీగా తగ్గింపు, రూ. వేల కోట్లలో ఆదా.. ‘సీరం’ సంచలన ప్రకటన!

కరోనా వైరస్ మహమ్మారి నివారణకు కొవిషీల్డ్‌ వ్యాక్సిన్‌ను అందిస్తున్న సీరం ఇన్‌స్టిట్యూట్‌ ఆఫ్‌ ఇండియా కీలక నిర్ణయం తీసుకుంది. రాష్ట్ర ప్రభుత్వాలకు సరఫరా చేస్తున్న టీకా ధరలను 25 శాతం తగ్గిస్తున్నట్లు సీరం ఇన్‌స్టిట్యూట్‌ సీఈవో అదర్‌ పూనావాలా ప్రకటించారు. రాష్ట్రాలకు ఇప్పటి వరకు ఒక్కో డోసును రూ.400కు విక్రయిస్తుండగా.. ఆ ధరను రూ.300కు తగ్గిస్తున్నట్లుగా అదర్‌ పూనావాలా వెల్లడించారు. ఈ మేరకు బుధవారం సాయంత్రం ఆయన ట్వీట్ చేశారు. తగ్గించిన ధరలు తక్షణమే అమల్లోకి వస్తాయని ఆయన ప్రకటించారు.

మానవతా దృక్పథంతో తీసుకున్న ఈ నిర్ణయంతో రాష్ట్రాలకు రూ. వేల కోట్ల నిధులు ఆదా కావడంతో పాటు ఎక్కువ మంది వ్యాక్సిన్‌ వేయించుకొనేలా దోహదపడుతుందని అదర్ పూనావాలా పేర్కొన్నారు. అలాగే, భారీ సంఖ్యలో ప్రాణాలను కాపాడేందుకు ఈ నిర్ణయం ఉపయోగపడుతుందని తెలిపారు. ఈ సంక్షోభ సమయంలో టీకాకు వేర్వేరు ధరలు నిర్ణయించడంతో రాష్ట్రాల నుంచి అభ్యంతరాలు వ్యక్తమైన నేపథ్యంలో వ్యాక్సిన్‌ ధరలు తగ్గించాలంటూ ఇటీవలే కేంద్ర ప్రభుత్వం కోరిన విషయం తెలిసిందే.
అయితే, కేవలం రాష్ట్ర ప్రభుత్వాలకు అందించే టీకాలకు మాత్రమే ఈ ధరను తగ్గిస్తున్నట్లు అధర్ వెల్లడించారు. సీరం ఇనిస్టిట్యూట్ విడుదల చేసిన కోవిషీల్డ్ వ్యాక్సిన్‌ను మూడు ధరల్లో విక్రయిస్తున్నారు. కేంద్ర ప్రభుత్వానికి రూ.150, రాష్ట్ర ప్రభుత్వాకు రూ.400, ప్రైవేటు సంస్థలకు, వ్యక్తులకు రూ.600కు అమ్ముతున్నారు. అయితే ఈ విషయమై దేశ వ్యాప్తంగా పెద్ద దుమారం చెలరేగుతోంది. ఒకే టీకాను ఇలా వేరు వేరు ధరలకు అమ్మడం ఏంటని విమర్శలు గుప్పిస్తున్నారు. కేంద్ర- రాష్ట్ర ప్రభుత్వాలకు అమ్మే ధరల్లో వ్యత్యాసం పట్ల పలు రాష్ట్రాలు తీవ్ర అభ్యంతరం వ్యక్తం చేశాయి. ఈ విషయమై కేంద్ర ప్రభుత్వంపై, సీరం ఇనిస్టిట్యూట్‌పై ఒత్తిడి పెరగడంతో ధర తగ్గించక తప్పలేదని అంటున్నారు. అయితే కేవలం రాష్ట్ర ప్రభుత్వాలకు విక్రయించే టీకా ధరలు మాత్రమే రూ. 300కు తగ్గించడం విశేషం.