యువతిపై నటుడు అత్యాచారం!

ఓ నటుడు తనపై అత్యాచారానికి పాల్పడ్డాడని 23 ఏళ్ల యువతి పోలీసులకు ఫిర్యాదు చేసింది. ఇటీవల కన్నడలో విడుదలైన హంబన చిత్రంలో క్యారెక్టర్ ఆర్టిస్ట్‌గా నటించిన సుబ్రమణ్యం తనపై అత్యాచారానికి పాల్పడినట్లు బసవనగుడి మహిళ పోలీస్ స్టేషన్‌లో ఫిర్యాదు ఇచ్చింది. శివమొగ్గ జిల్లా తీర్థహళ్లికి చెందిన సుబ్రమణ్యంతో రాజాజీనగర్‌కు చెందిన బాధిత యువతి రెండేళ్లుగా ప్రేమలో ఉంది. వీరి పెళ్లికి పెద్దలు కూడా అంగీకరించారు. అయితే షూటింగులతో తీరిక లేదని జులైలో తన సినిమా విడులైన తర్వాత వివాహం చేసుకుందామని అన్నాడు. తీరా జులైలో మళ్లీ అక్టోబరుకు వాయిదా వేసుకుందామని ఒప్పించాడు. ఈ గడువు కూడా దాటిపోవడంతో గత నవంబర్‌ 1 న తన సోదరి ఇంట్లో పార్టీ ఉందనిచెప్పి ఆ యువతిని ఆహ్వానించాడు.

ఇది నిజమని నమ్మిన బాధితురాలు అక్కడకు వెళ్లేసరికి మత్తు మందు కలిపిన కూల్ డ్రింక్‌ ఇచ్చాడు. ఆ డ్రింక్‌ తాగిన తర్వాత స్పృహకోల్పోయిన యువతిపై అత్యాచారానికి పాల్పడినట్లు యువతి తన ఫిర్యాదులో పేర్కొంది. ఆ తర్వాత నుంచి తప్పించుకుని తిరుగుతున్నాడని, పెళ్లి చేసుకోమంటే మొహం చాటేశాడని వాపోయింది. తాము అంత ధనికులం కాకపోవడంతోనే పెళ్లి చేసుకోడానికి ఇప్పుడు నిరాకరిస్తున్నాడని తెలిపింది. యువతి ఫిర్యాదు ఆధారంగా కేసు నమోదు చేసిన పోలీసులు సుబ్రహ్మణ్యం కోసం గాలిస్తున్నారు.