కాసేపట్లో పెళ్లి.. వధువు మృతి, వరునికి గాయాలు

వారిద్దరూ ప్రేమించుకున్నారు. వారి ప్రేమని పెద్దల సాయంతో పెళ్లిగా మార్చుకోవాలని ఆశపడ్డారు. పెద్దలు కూడా వారి పెళ్లికి సుముఖతో వ్యక్తం చేసి ముహూర్తం పెట్టేశారు. పెళ్లికి కొన్ని గంటలు ఉందనగా అనుకోని ప్రమాదంలో వధువు మరణించగా, వరుడు తీవ్రగాయాల పాలయ్యాడు. ఈ ఘటన బెంగళూరులో జరిగింది. దివ్య కుడేర్కర్ (20), హరీష్ లు ప్రేమికులు. ఇరు కుటుంబాలను పెళ్లికి ఒప్పించారు. గురువారం ఉదయం ధర్మస్థలంలో పెళ్లి. పెళ్లి బట్టలతో వధూవరులు, బంధువులు టెంపోలో బయలుదేరారు. అనంతవాడి సమీపంలోకి రాగానే ఎదురుగా వస్తున్న బస్సు, టెంపోను ఢీ కొంది. ఈ ఘటనలో టెంపోలోని ఆరుగురు అక్కడికక్కడే మరణించారు. వారిలో వధువు దివ్య కూడా ఉంది.

పెళ్లి కొడుకు హరీష్ తీవ్రంగా గాయపడ్డాడు. క్షతగాత్రులను దగ్గర్లోని ఆసుపత్రిలో చేర్చారు పోలీసులు. హరీష్ కి దివ్య చనిపోయినట్టు ఇంకా చెప్పలేదు. అసలే అతని పరిస్థితి విషమంగా ఉండడంతో... చెప్పకుండా దాచారు. దివ్య లేదన్న సంగతి హరీష్ తట్టుకోలేడు. అతను కాస్త కోలుకున్నాక విషయం చెబుదామని అనుకుంటున్నారు బంధువులు. ప్రేమ పెళ్లికి కొన్ని గంటల్లోనే ఇలా జరగడం వారి ఆత్మీయులను, స్నేహితులను తీవ్రంగా కలచి వేసింది.