పవర్ దొంగల పనిపట్టడానికి ‘బెస్ట్’ ప్రణాళిక!

కరెంట్ దొంగల పని పట్టడానికి ముంబై నగర పాలక సంస్థ ఓ మంచి ప్రణాళికతో ముందుకొచ్చింది. దానికి ఇంటర్నెట్‌ను మాధ్యమంగా ఎంచుకుంది. ఒక వ్యక్తి లేదా సంస్థ అక్రమంగా విద్యుత్ వాడుతున్నట్లు ఎవరైనా గుర్తిస్తే.. ‘బృహన్ ముంబై ఎలక్ట్రిక్ సప్లై అండ్ ట్రాన్స్‌పోర్ట్ (BEST)’కు సంబంధించిన వెబ్‌సైట్ (www.bestundertaking.com) ద్వారా సమాచారం ఇవ్వవచ్చు. దీనికి గాను సమాచారమిచ్చిన వ్యక్తికి ఆ సంస్థ 5 నుంచి 50 వేల రూపాయల వరకు నగదు బహుమతిని అందిస్తుంది. అంతే కాకుండా ఇన్ఫర్మేషన్ ఇచ్చిన వ్యక్తి వివరాలను గోప్యంగా ఉంచుతుంది.

అక్రమంగా విద్యుత్ చౌర్యానికి పాల్పడుతున్నట్లు కేసు ఫైల్ చేసి గెలిస్తే.. రికవరీ ద్వారా వచ్చే నగదులో సమాచారమిచ్చిన వారికి 5 శాతం వరకు ఇవ్వడానికి ‘బెస్ట్’ నిర్ణయం తీసుకుంది. విద్యుత్ చట్టం - 2003 ప్రకారం.. అక్రమంగా విద్యుత్‌ను వాడినవారిపై నాన్ బెయిలబుల్ కేసు పెట్టవచ్చు. నేరం రుజువైతే.. నష్ట పరిహారం చెల్లించడంతో పాటు, మూడేళ్ల వరకు జైలు శిక్ష కూడా విధిస్తారు.

చట్టంలో ఇలాంటి కఠిన నిబంధనలున్నా.. విద్యుత్ చౌర్యం షరా మామూలే అయింది. సరఫరా తీగల నుంచి నేరుగా విద్యుత్‌ను వాడుకోవడం, ఎలక్ట్రిక్ మీటర్లను బిగించుకోకపోవడం, మీటర్లను ట్యాంపరింగ్ చేయడం, మీటర్ పనితీరును ప్రభావితం చేయడం, అక్రమంగా మీటర్ రీడింగ్‌లను మార్చడం, ఇతర పద్ధతుల్లో విద్యుత్‌ను వాడుకోవడం లాంటి విధానాలతో విద్యుత్ చౌర్యానికి పాల్పడుతున్నారు. దీంతో విద్యుత్ సంస్థలు కోట్ల రూపాయల ఆదాయాన్ని కోల్పోతున్నాయి. ముంబై నగరంలో 2017 జనవరి, ఫిబ్రవరి నెలల్లో రూ.8.38 కోట్ల రికవరీకి సంబంధించిన 356 కేసులు నమోదు చేయగా, ఇప్పటివరకూ రూ.1.38 కోట్లు రికవరీ అయ్యాయంటే పరిస్థితి ఎంత తీవ్రంగా ఉందో అర్థం చేసుకోవచ్చు.

ఇలాంటి దొంగలు మన హైదరాబాద్‌లో ఎంత మంది ఉన్నారో మరి.. ఈ రకమైన చోరులను గుర్తించి, నగదు రికవరీ చేస్తే.. తెలంగాణ ప్రభుత్వానికి విద్యుత్ చార్జీలు పెంచే అవసరం కూడా ఉండదేమో..