ఎమ్మెల్యే బాడీగార్డ్ ఖాతాలో రూ.100 కోట్లు

ఉత్తరప్రదేశ్‌లోని సమాజ్‌వాదీ పార్టీకి చెందిన ఓ ఎమ్మెల్యే బాడీగార్డ్ తన బ్యాంక్ ఖాతాలో సుమారు రూ.100 కోట్లు జమ అవడంతో షాక్‌కు గురయ్యాడు. ఈ మేరకు కాన్పూర్ జిల్లా మెజిస్ట్రేట్ కౌశల్ రాజ్ శర్మ వెల్లడించిన వివరాల ప్రకారం.. ఎస్పీ ఎమ్మెల్యే ఇర్ఫాన్ సోలంకి బాడీ‌గార్డ్ అయిన గులామ్ జిలానీకి ఎస్బీఐలో ఖాతా ఉంది. మంగళవారం రాత్రి జిలానీ డబ్బులు డ్రా చేసేందుకు ఏటీఎంకు వెళ్లాడు. ఏటీఎంలో లావాదేవీ జరిపిన జిలానీ తన ఖాతాలో రూ. 99,99,02,724 జమ అయినట్లు గుర్తించాడు.

దీంతో జిలానీ ఈ విషయాన్ని తన బాస్, ఎమ్మెల్యే సోలంకి దృష్టికి తీసుకెళ్లడంతో ఆయన జిల్లా మెజిస్ట్రేట్‌కు ఫిర్యాదు చేసారు. అయితే ఈ విషయమై ఎస్బీఐ బ్రాంచ్ డిప్యూటీ జనరల్ మేనేజర్‌ను సంప్రదించామని, ఆయన జిలానీని ఒక అప్లికేషన్‌ ఇవ్వమన్మారని జిల్లా మెజిస్ట్రేట్ కౌశల్ వెల్లడించారు. జిలానీ బ్యాంకు ఖాతాను సీజ్ చేసామని, ప్రస్తుతానికి ఆ ఖాతా నుంచి డబ్బులు డ్రా చేయడానికి కుదరదని చెప్పారు.